İstanbul Mahkemesi 97 Numaralı Sicil (H.1217-1225 / M. 1802-1810) cilt: 83, sayfa: 373 Hüküm no: 256 Orijinal metin no: [99a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Galata’da çıkan yangında yanan binaların çoğu ahşap olduğundan, yeni yapılacak binaların dış taraflarında ahşap kullanılmaması ve belirtilen diğer hususlara uyulması Bâ-sah. İstanbul Kādısı Fazîletlü Efendi Âsitâne-i sa‘âdet ve havâlîsinde aralıkda zuhûr eden harîklerin def‘-i esbâb-ı zâhiriyyesine dikkat olunmakda ise dahi çend-rûz mukaddemce vukū‘ bulan Galata harîkinde muhterik olan mahallerin mecmû‘u derûn ve bîrûnu dolmadan ârî olarak sırf ahşâbdan olduğu meşhûd olduğundan fîmâ-ba‘d Âsitâne-i sa‘âdetde ve Üsküdar ve Galata ve Hâslar tarafları ve havâlîlerinde binâ ve inşâ olunan ebniyenin taşra cevânibinden hiçbir tarafına tahta kaplanmayıp mu‘tâd üzere sıva olmak ve göbek şehnişîni yapılmayıp cunba çıkmamak ve saçakları dahi sıvama kirpi saçak olmak ve binâ üzerlerine tahtessemâ ve künkden ocak kuburu yapılmamak ve mahâll-i ebniyenin havâle-i mu‘ayyene-i kadîmesinden ziyâde caddeden bir karış yer alınmamak husûslarına irâde-i seniyye müte‘allik olmakdan nâşî bu husûsu mi‘mârân ve mu‘temedân ve neccâr kalfaları ve sâir iktizâ edenlere gereği gibi tenbîh ve te’kîd ve mugāyir-i tenbîhât inşâya cesâret ederi olur ise tedîb olunacağını tefhîm ve men‘ ve tehdîd eylemesi bâ-fermân-ı âlî Mi‘mâr Ağa’ya tenbîh olunmuş olmağla imdi ba‘d-ezîn işbu nizâmın düstûrü’l-amel tutulmasına ihtimâm ve gayret ve dâimâ taharrî ve tecessüs birle nizâm-ı mezkûrun mugāyiri ebniye inşâsına cesâret eden her kim olur ise olsun hâtır ve gönüle mürâ‘ât olunmayarak tedîbleri icrâsı için ihbâr ve ifâdeye mübâderet ve bu vesîle ile ashâb-ı ebniye bilâ-mûcib tazyîk ve ızrâr olunmak misillü hâlât-ı nâ-marzıyeden tevakkī ve mübâ‘adet eyleyesin deyü. Fî 17 Zilka‘de sene 1222