İstanbul Mahkemesi 97 Numaralı Sicil (H.1217-1225 / M. 1802-1810) cilt: 83, sayfa: 380 Hüküm no: 262 Orijinal metin no: [101a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Saraç esnafına Osmanlı ordusu için, belirtilen cins ve miktarlarda saka takımı imal ettirilmesi Düstûrü’l-mükerrem, müşîru’l-mufahham, nizâmü’l-âlem, müdebbiru’l-umûri’l-cumhûri bi’l-fikri’s-sâkıb, mütemmimü mehâmmü’l-enâmi bi’r-re’yi’s-sâib, mümehhidü bünyânü’d-devleti [ve]’l-ikbâl, müşeyyidü’l-erkâni’s-sa‘âdeti ve’l-iclâl, el-mahfûfu bi-sunûf-i avâtıfı’l-Meliki’l-a‘lâ Rikâb-ı hümâyûnum Kāimmakāmı Vezîrim es-Seyyid Mahmud Tayyar Paşa -edâmallâhü te‘âlâ iclâlehû- ve akzâ kuzâtü’l-Müslimîn, evlâ vülâti’l-muvahhidîn, ma‘denü’l-fazli ve’l-yakīn, râfi‘u’l-a‘lâmi’ş-şerî‘ati ve’d-dîn, vârisü’l-ulûmü’l-enbiyâi ve’l-mürselîn, el-muhtassu bi-mezîd-i inâyeti’l-Meliki’l-mu‘în mevlânâ İstanbul Kādısı -zîdet fezâilühû- ve iftihârü’l-ümerâi ve’l-ekâbir, müstecmi‘u cemî‘i’l-ma‘âlî ve’l-mefâhir, el-muhtassu bi-mezîd-i inâyeti’l-Meliki’l-kādir Rikâb-ı hümâyûnum Defterdârı Mehmed Râgıb -dâme ulüvvuhû- ve iftihârü’l-emâcid ve’l-ekârim, câmi‘ü’l-mahâmid [101b] ve’l-mekârim, el-muhtassu bi-mezîd-i inâyeti’l-Meliki’d-dâim Rikâb-ı hümâyûnumda Sekbânbaşı olan -dâme mecduhû- tevkī‘-i refî‘-i hümâyûn vâsıl olucak ma‘lûm ola ki Sen ki Kāimmakām-ı müşârün-ileyhsin, Ocağ-ı âmirem tarafından takdîm olunan bir kıt‘a arzuhâl mefhûmunda ordu-yı meşteyân duhûlünde Ocağ-ı âmireme öteden beri verilegelen meşk ve musluk ve kırbalar Ocak’dan ta‘yîn olunan Sakābaşı mübâşereti ve Âsitâne-i sa‘âdet-âşiyânemde sarrâc esnâfı ma‘rifetiyle i‘mâl ve tekmîl ve evvel-bahârda ordu-yı hümâyûnuma celbi ve ihzâr olunmak mu‘tâd olduğundan Devlet-i Aliyye-i ebediyyü’l-karârımla Rusyalu beyninde şimdiki hâlde her ne kadar mütâreke derkâr ise dahi merâsim-i hazm ü ihtiyâta ri‘âyet [ve] muktezî olan saka takımlarının sâbıkı mûcebince Ocak tarafından ta‘yîn olunan Sakābaşı mübâşereti ve esnâf-ı merkūme ma‘rifetiyle i‘mâl ettirilmesi için lâzım gelen bahâsı i‘tâsıyla emr-i şerîfim ısdârı istid‘â olmağla kuyûda mürâca‘at olundukda iki yüz üç senesinde Ocağ-ı âmirem tarafından ta‘yîn olunan Sakābaşı mübâşereti ve esnâf-ı merkūm ma‘rifetiyle muktezî olan sakā takımları i‘mâl ve tekmîl ettirilip masârifi Rikâb-ı hümâyûnum Hazînesi’nden i‘tâsı için tezkiresi ve emri verilmiş olduğu ba‘de’l-ihrâc kuyûd-ı sâbıkaları mûcebince beher çifti sekizer buçuk guruşa olmak üzere üç yüz elli çift meşk ve beheri altışar guruşa olmak üzere iki yüz aded musluk ve beheri birer guruşa <> birer rub‘a olmak üzere bin iki yüz aded arka kırbasının bahâları hesâb ettirildikde beş bin altı yüz yetmiş beş guruşa bâliğ olduğu Başmuhâsebe’den derkenâr ve hesâb olmağla sâbıkı ve hesâb olunduğu üzere mühimmât-ı mezkûrenin bahâsı olan meblağ-ı mezbûrun Rikâb-ı hümâyûnum Hazînesi’nden i‘tâsı için tezkiresi verilmekle imdi mühimmât-ı mezkûre sâbıkı mûcebince Ocağ-ı âmirem tarafından ta‘yîn olunan Sakābaşı ve esnâf-ı merkūm ma‘rifetiyle i‘mâl ve tekmîl olunup ordu-yı hümâyûnuma irsâl olunmak fermânım olmağın bâ-telhîs işbu emr-i celîlü’l-kadrim ısdâr ve irsâl olunmuşdur. İmdi vusûlünde mühimmât-ı merkūmenin sâbıkı mûcebince tanzîm ve tekmîl ve evvel-bahârda ordu-yı hümâyûnuma irsâl olunması husûsunu iktizâ edenlere tenbîhe bezl-i cüll-i himmet ve sarf-ı küll-i miknet eyleyesin ve siz ki mevlânâ [ve] defterdâr ve sekbânbaşı-i mûmâ-ileyhi[m]siz, sizler dahi mühimmât-ı mezbûrenin ber-vech-i muharrer tanzîm[i] husûsuna sarf-ı yârâ-yı gayret eylemeniz bâbında fermân-ı âlî-şânım sâdır olmuşdur. Buyurdum ki: Hükm-i şerîfimle vardıkda bu bâbda vech-i meşrûh üzere şeref-yâfte-i sudûr olan işbu emr-i şerîf-i celîlü’ş-şân-ı vâcibü’l-ittibâ‘ ve lâzımü’l-imtisâli[min] mazmûn-ı münîfi birle âmil olup hilâfına rızâ ve cevâz göstermeyesiz. Şöyle bilesiz alâmet-i şerîfe i‘timâd kılasız. Fî 29 Zilka‘de sene 1222 Be-makām-ı Kostantıniyye