İstanbul Mahkemesi 97 Numaralı Sicil (H.1217-1225 / M. 1802-1810) cilt: 83, sayfa: 381 Hüküm no: 263 Orijinal metin no: [101b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Sehven kapatılan isimleri yazılı 4 adet francalacı fırınının tekrar açılması hususunda ferman çıkarılması için İstanbul Kadısı tarafından ilamda bulunulması İstanbul Kādısı Fazîletlü Efendi Cennet-mekân, firdevs-âşiyân Gāzi Sultân Abdülhamid Han -tâbe serâhu- hazretlerinin Beylerbeyi ve Mîrgûnoğlu nâm mahallerde müceddeden binâ ve inşâ buyurdukları Câmi‘-i şerîfeleri evkāfından mahâll-i merkūmede vâki‘ iki aded francalacı fırınları ve Mehd-i ulyâ-yı saltanat devletlü, <> ismetlü efendimiz hazretlerinin mülkiyet üzere mutasarrıf oldukları Topcular civârında Gümrükcü Çiftliği derûnunda kâin bir bâb francalacı fırını ve Çelebi Hasan Paşa Vakfı’ndan Kumkapı hâricinde vâki‘ İstefan ve Ohannes ve Haçador nâm zimmîlerin mutasarrıf oldukları kezâlik bir bâb francalacı fırını ki cem‘an dört aded fırınların sedd ü bendi iktizâ etmez iken mukaddemce ma‘lûmü’l-ism yedi aded francalacı dükkânları ibkāsıyla mâ‘adâsına bâ-irâde-i seniyye hîn-i seddinde bunlar dahi adem-i dikkatden nâşî sehve mebnî sedd ü bend olunmuş ise dahi işbu dört aded fırınlar sâire makīs olmayıp evkāf-ı şerîfe-i mezkûreden olmalarıyla bu keyfiyet evkāf-ı mezkûreye gadri mûcib ve îrâdlarının kesr u tedennîsini müstevcib olduğuna binâen sâire sirâyet etmemek ve bir vakitde emsâl olarak kaydı derkenâr olunmamak şartıyla fakat bâlâda mezkûr dört aded fırınların küşâdıyla on bir adede iblâğı husûsuna bu def‘a irâde-i kātı‘a-i hazret-i cihân-dârî ta‘alluk etmekle [102a] imdi şurût-ı muharrere-i mezkûre indir[â]cıyla ancak işbu dört aded francalacı fırınlarının küşâdına ruhsatı hâvî kaleminden emr-i şerîf ısdâr ve evkāf-ı şerîfe-i mezkûre ve sâir iktizâ eden mahallere ilmühaberleri i‘tâsını i‘lâma müsâra‘at eyleyesin deyü. Fî 22 Zilhicceti’ş-şerîfe sene 1222