İstanbul Mahkemesi 97 Numaralı Sicil (H.1217-1225 / M. 1802-1810) cilt: 83, sayfa: 416 Hüküm no: 298 Orijinal metin no: [113b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mercan Çarşısı’ndaki yanık fırın ve değirmenin havaî gediğinin başka bir yere nakledilmek üzere Kurdoğlu Yorgi Kalfa üzerine kaydedilmesi Berây-ı zabt u tasarruf-ı gedik-i fırın ve değirmen der-kurb-i Mercan der-İstanbul ki, pîş ez-în fırın ve değirmen-i mezkûr mesdûd bûde ve bâ-şart-ı gedik-i fırın ve değirmen-i mezkûr be-mahâll-i âhar nakl-eş be-Yorgi zimmî ta‘ahhüd kerde ve sûret dâde istid‘â-yı inâyet kerde, sûret dâde müverrah el-vâki‘ der-sene 1223 [ber]-mûceb-i memhûr i‘lâm-ı Mehmed Tahir Efendi Kādî-ı İstanbul bâ-fermân-ı âlî 24 Ş sene 1223 ve bâ-fermân-ı şerîf. Fırın-ı habbâz ma‘a-değirmen Bâb: 1 Horos: 9 *** Kurdoğlu Yorgi Kalfa’nın fırın sûreti. Markar zimmînin Dîvân-ı Hümâyûn’a takdîm eylediği arzuhâli mefhûmunda Markar v. Ovannes zimmî kendi nefsinden asâleten ve li-ebeveyn karındaşı olup bundan akdem hâlik olan Bogos v. el-mersûm Ovannes zimmînin verâseti sulbiye kebîre kızları Serpuhi ve Anna Nasrâniyeler ile sulbî kebîr oğlunun oğlu sagīr Matos ve oğlunun kebîre kızı Takohi v. Matos’a inhisârı tahakkukundan sonra sagīr-i mersûmun tesviye-i emrine vasîyy-i mansûbu olup ve mersûmân Serpuhi ve Anna ve Takohi Nasrâniyeler taraflarından husûs-ı âti’l-beyânda vekîl-i sâbitü’l-vekâlesi olmağla vekâleten ve vesâyeten Çarşamba günü Arz Odası’nda huzûr-ı hazret-i Sadâret-penâhîde ve ba‘dehû İstanbul Kādısı Efendi hazretlerinin hânelerinde ma‘kūd meclis-i şer‘-i münîrde, zikri âtî muhterik değirmen ve fırın arsasına kârgir han binâ olunmuş olan mutasarrıf olan neccâr kalfalarından Kurdoğlu Yorgi v. Lazari zimmînin bi-tarîkı’l-istiğlâl ferâğından hâlâ mutasarrıfesi Vangeline bt. Hristo nâm Nasrâniye tarafından husûs-ı âtîde şahsını bilir keresteci Sotiri v. Vasil ve Yorgi v. Lazari zimmîler şehâdetleriyle sâbit olan mersûm Yorgi Kalfa muvâcehesinde habbâzân kethudâsı ve bi’l-cümle nizâm ustaları hazır oldukları hâlde; İstanbul Mercan Çarşısı’nda vâki‘ bir bâb ekmekci fırını ve içinde dokuz horoslu bir bâb ekmekci değirmeni derûnunda mevcûd beyne’l-esnâf gedik ta‘bîr olunan otuz altı re’s [114a] bargir ve sâir âlât-ı lâzıme-i ma‘lûmenin on sekiz bargir hissesi benim ve mâ‘adâ on sekiz bargir hissesi karındaşım hâlik-i mersûm Bogos zimmînin ale’l-iştirâki’s-seviy yedimizde mülkümüz iken değirmen ve fırın-ı mezkûr bin iki yüz yedi senesinde muhterik olup ol târihden beri arsa-i hâliye kaldıkda arsa-i merkūmenin mutasarrıfesi Şeyhülislâm-ı esbak merhûm Murtaza Efendi kerîmesi Ümmügülsüm Hanım’a arsa-i merkūmeyi han binâ ve inşâsına izn-i hümâyûnu mutazammın yedinde olan emr-i âlî-şân verildikden sonra mûmâ-ileyhâ Ümmügülsüm Hanım arsa-i merkūmeyi bâ-re’y-i mütevellî mersûm Yorgi zimmîye ferâğ ve tefvîz ol dahi ber-vech-i muharrer ba‘de’t-tefevvüz fırın ve değirmen-i mezkûrun deyn-i mîrîsi olan üç bin otuz iki guruşu cânib-i mîrî için kabzına me’mûra edâ ve teslîm ve ma‘lûmü’l-esâmî tüccâra deyni olan beş bin dört yüz altmış sekiz guruş ki cem‘an sekiz bin beş yüz guruşu mersûm Yorgi Kalfa ashâb-ı düyûna edâ ve teslîm edip ve havâyî gediği nâmıyla karındaşım hâlik-i mersûmun vereseleri mersûmûna mevrûs olmağla zikrolunan fırın ve değirmen muhterik olmak hasebiyle bizim külliyetlü zarar ve hüsrânımız olup el-yevm on üç bin beş yüz guruş deynimiz olmağla fırın ve değirmen-i mezkûrların havâyî gediğini mersûm Yorgi Kalfa değer bahâsıyla iştirâ eylesin yâhûd kurb ve civârında bizim için bir fırın ve değirmen binâ eylesin, deyü tesâddî eylediğim da‘vâ-yı mezkûrları şer‘an mesmû‘a ve mu‘teber olmadığı bana tefhîm olundukdan sonra beynimize muslihûn tavassut edip zikrolunan havâyî gediği ben bi’l-asâle ve bi’l-vekâle ve bi’l-vesâye mersûm Yorgi Kalfa’ya iki bin yüz guruşa tarafeynden bi’l-îcâb ve’l-kabûl bâten ve sahîhan bi-safkatin vâhide bey‘ ve temlîk eylediğimde ol dahi ber-minvâl-i muharrer iştirâ ve temellük ve kabûl eyledikden sonra semeni olan meblağ-ı mezbûr iki bin yüz guruşu müşteri-i mersûm Yorgi Kalfa üç gün tamamında edâya müte‘ahhid olup fîmâ-ba‘d mârrü’z-zikr fırın ve değirmen gediğinde benimle vasîsi olduğum sagīr-i mersûm ve müvekkilelerim verese-i mersûmânın kat‘an alâka ve medhalimiz kalmayıp mesfûr Yorgi Kalfa’nın mülk-i müşterâsı ve hakk-ı sırfı olmuşdur, dedikde ol dahi tasdîk ve meblağ-ı mezbûru târih-i i‘lâmdan üç gün tamamında edâya müte‘ahhid olmağla gedik-i mezkûr hasbe’l-iktizâ münâsib ve muhtâc olan bir mahalle naklolunmak üzere mesfûr Yorgi Kalfa uhdesine kayd ve yedine sûret i‘tâsını İstanbul Kādısı fazîletlü Mehmed Tahir Efendi hazretleri i‘lâm etmekle i‘lâmı mûcebince kayd ve sûret verilmek fermânım olmağın mûcebince kaydolunup işbu mahalle şerh verildi. Fî 2 N sene 1223