İstanbul Mahkemesi 97 Numaralı Sicil (H.1217-1225 / M. 1802-1810) cilt: 83, sayfa: 425 Hüküm no: 308 Orijinal metin no: [116a-4] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ölenlerden geriye kalan miras mallarına, belirtilen durumlar tahakkuk etmedikçe devlet tarafından dokunulmaması Cânib-i mîrîden veresenin mirasına ta‘arruz etmemek emri. Bâ-sah. İstanbul Kādısı İzzetlü, Fazîletlü Efendi Hazretleri Bir müddetden beri mîrînin kesret-i masârifi cihetiyle muzâyaka derkâr olduğundan medâr olur mülâhazasıyla cânib-i mîrîden zabtolunan muhallefâtların ekseri mal-ı eytâm olup medâr değil, envâ‘-ı hasârı mûcib olmağla her ne kadar muzâyaka derkâr ise de hasbeten lillâhi te‘âlâ bu maddenin men‘i husûsuna irâde-i kātı‘a-i cihân-dârâne ta‘alluk ederek fîmâ-ba‘d ricâl ve efrâd ve vücûh-i memâlikden mîrî ile ahz ü i‘tâları olmayanların evlâd ve yetîmleri kaldığı hâlde kat‘an muhallefâtına cânib-i mîrîden dokunulmamak ve bu makūleden mîrî ile hesâbı olanların fakat zimmet-i mîrîyyesi alınıp mâ‘adâ bir nesnesine vaz‘-ı yed olunmamak ve bilâ-veled ölenlerden umûr-ı cihâd için zabta şâyân olanlar dahi vereselerinin hâllerine göre mikdâr-ı münâsibi i‘tâ olunarak tanzîm olunmak ve cesîm vakıf konak ve yalı ashâbından bilâ-veled fevt olanların konak ve yalı esmânına cânib-i mîrîden müdâhale olunmayıp vakfa âid olmak ve ba‘zan Anadolu ve Rumeli’de ashâb-ı servetden olanların vefâtında evlâdı babası hânedânını idâre ile sâye-i şâhânede temettu‘ edeceğine mebnî levâzım-ı umûr-ı cihâd için o makūlelerin muhallefâtı mîrîye âid olarak münâsibi vechile tanzîm kılınmak bâbında şeref-efzâ-yı sudûr olan hatt-ı hümâyûn mûcebince memâlik-i mahrûsede vâki‘ vüzerâ ve mîrimîrân ve mevâlî ve kuzât ve sâire hitâben evâmir-i aliyye ısdâr ve tisyâr olunmağla imdi İstanbul ve Galata ve Üsküdar ve Eyüp mahkemeleri sicillâtına kayd ü sebt ettirtip muktezâ-yı irâde-i seniyyenin icrâsına himmet eyleyeler deyü. Fî 25 L sene [12]23