İstanbul Mahkemesi 97 Numaralı Sicil (H.1217-1225 / M. 1802-1810) cilt: 83, sayfa: 446 Hüküm no: 328 Orijinal metin no: [121a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Kazaz Arutin’in borçlarının, tek seferde ödeyemeyeceği hukuken sabit olur ise taksitlendirilmesi ve haksız yere murabaha talep ettirilmemesi 30.331 guruş deyni taksît. Akzâ kuzâtü’l-Müslimîn, evlâ vülâti’l-muvahhidîn, ma‘denü’l-fazli ve’l-yakīn, râfi‘u a‘lâmi’ş-şerî‘ati ve’d-dîn, vârisü ulûmü’l-enbiyâi ve’l-mürselîn, el-muhtassu bi-mezîd-i inâyeti’l-Meliki’l-mu‘în mevlânâ İstanbul Kādısı -zîdet fezâilühû- tevkī‘-i refî‘-i hümâyûn vâsıl olucak ma‘lûm ola ki Der-aliyye’m mütemekkinlerinden ve kazzâz esnâfından Arutin nâm zimmînin Südde-i sa‘âdetime takdîm eylediği arzuhâlinde; bunun yine Der-aliyye’m sâkinlerinden murâbahacı tâifesinden İbrahim nâm kimesneye iki yüz on beş ve Abdülkerim nâm kimesneye dahi yedi yüz elli beş ve Mehmed nâm kimesneye iki bin beş yüz doksan beş ve Muhsin Çelebi nâm kimesneye bin yirmi beş ve Hacı Bekir nâm kimesneye dahi üç bin yedi ve Ahmed nâm kimesneye dahi üç bin yetmiş dört buçuk ve Seyyid Ömer nâm kimesneye dahi bin yüz doksan dört buçuk ve Ellez zimmîye dört bin beş yüz otuz bir ve Yoseb zimmîye iki bin beş yüz ve Horus Nasrâniyeye iki bin ve Arutin zimmîye bin ve Delot zimmîye beş yüz doksan beş ve Haçador zimmîye beş bin ve sarrâf tâifesinden Mıgırdıç zimmîye iki bin ve Kuyumcu Karabet zimmîye bin ve Dülbendci İstefan zimmîye bin ve Simkeş Yoseb zimmîye bin beş yüz ve Merâmetcioğlu Agop zimmîye bin ve sâir ma‘lûmü’l-ism kimesnelere perâkende olarak bin dört yüz yirmi dört guruş ki cem‘an otuz bin üç yüz otuz bir guruş deyni olup mebâliğ-ı mezbûreyi def‘aten edâya kudreti olmayıp def‘aten talebi ve ahz ü habs teklîfiyle te‘addî ve rencîde olunmak îcâb etmez iken dâyinleri mezbûrlar def‘aten taleb ve ahz ü habs teklîfiyle te‘addî ve rencîdeden hâlî olmadıklarından mâ‘adâ hilâf-ı şer‘ ez‘âf-ı muzâ‘af murâbaha nâmıyla her biri alacakları meblağ üzerine küllî akçe zammıyla mağdûr olduğun inhâ ve dâyinleri mezkûrlara olan deynini taksît-ı şer‘î ile edâ ettirilip hilâf-ı şer‘-i şerîf def‘aten taleb ve ahz ü habs teklîfiyle vâki‘ olan te‘addîleri men‘ u def‘ olunmak bâbında emr-i şerîfim sudûrunu istid‘â ve Dîvân-ı Hümâyûn’umdan şurûtu suâl olundukda; medyûnun dâyinlerinden istikrâz eyledikleri akçe beher sene üzerlerine devr-i şer‘î ve ilzâm-ı ribh olunmuş değil ise min-ba‘d murâbaha taleb olunmayıp ve eğer devr-i şer‘î ve ilzâm-ı ribh olunmuş ise de senede onu on bir buçukdan ziyâde murâbahaya ruhsat verilmemekle devr-i şer‘î ve ilzâm-ı ribh olunan senelerde onu on bir buçukdan ziyâde ve devr-i şer‘î ve ilzâm-ı ribh olunmayan senelerde murâbaha nâmıyla alınan akçe asl-ı mâla zam ve tak[ā]s ve bâkī kalan deynlerin def‘aten edâya adem-i kudretleri şer‘an sâbit olur ise o makūle def‘aten edâ-yı deyne adem-i kudreti [121b] sâbit olan medyûnun taksît-ı şer‘î ile edâ-yı deyn ettirilmesi için Dîvân-ı Hümâyûn’umdan emr-i şerîf yazılagelmişdir deyü tahrîr olunmağla sen ki mevlânâ-yı mûmâ-ileyhsin, vech-i meşrûh üzere amel olunmak fermânım olmağın imdi ber-vech-i muharrer mesfûr Arutin zimmînin dâyinleri mezkûrûn ve mesfûrûn ve mersûmeden istikrâz eylediği akçe beher sene üzerine devr-i şer‘î ve ilzâm-ı ribh olunmuş değil ise min-ba‘d murâbaha taleb ettirmeyesin ve eğer devr-i şer‘î ve ilzâm-ı ribh olunmuş ise de senede onu on bir buçukdan ziyâde murâbahaya ruhsat verilmemekle devr-i şer‘î ve ilzâm-ı ribh olunan senelerde onu on bir buçukdan ziyâde ve devr-i şer‘î ve ilzâm-ı ribh olunmayan senelerde murâbaha nâmıyla me’hûzları olan akçe her ne ise asl-ı mâla zam ve tak[ā]s ve bâkī kalan düyûnunu def‘aten edâya adem-i kudreti dâyinleri muvâcehelerinde ber-nehc-i şer‘î sâbit ve mütehakkık olur ise taksît-ı şer‘î ile edâ-yı deyn ettirtip def‘aten taleb ve ahz ü habs teklîfiyle te‘addî ve rencîde ettirilmemek bâbında fermân-ı âlî-şânım sâdır olmuşdur. Buyurdum ki: Hükm-i şerîfimle ( ) vusûl buldukda bu bâbda vech-i meşrûh üzere şeref-yâfte-i sudûr olan fermân-ı vâcibü’l-ittibâ‘ ve lâzımü’l-imtisâlimin mazmûn-ı itâ‘at-makrûnuyla amel ve hareket ve hilâfından ittikā ve mübâ‘adet eyleyesin. Şöyle bilesin alâmet-i şerîfe i‘timâd kılasın. Tahrîren fî-evâhiri şehri Saferü’l-hayr sene erba‘a ve işrîn ve mieteyn ve elf. Kostantıniyyeti’l-mahrûse