İstanbul Mahkemesi 97 Numaralı Sicil (H.1217-1225 / M. 1802-1810) cilt: 83, sayfa: 448 Hüküm no: 329 Orijinal metin no: [121b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Daha önce ferman gereğince kapatılmış olan Hatice Sultan’ın Malta Çarşısı’ndaki francalacı fırınının yeniden açılmasına izin verildiği Malta’da francalacı fırını küşâdı. Akzâ kuzâtü’l-Müslimîn, evlâ vülâti’l-muvahhidîn, ma‘denü’l-fazli ve’l-yakīn, râfi‘u a‘lâmi’ş-şerî‘ati ve’d-dîn, vârisü ulûmü’l-enbiyâi ve’l-mürselîn, el-muhtassu bi-mezîd-i inâyeti’l-Meliki’l-mu‘în mevlânâ İstanbul Kādısı Mustafa Âsım -zîdet fezâilühû- tevkī‘-i refî‘-i hümâyûn vâsıl olucak ma‘lûm ola ki Atanaş ve Gerih nâm zimmîlerin Dîvân-ı Hümâyûn’uma takdîm eyledikleri arzuhâlleri mefhûmunda İstanbul’da Sultân Mehmed kurbünde Malta Çarşısı’nda kâin, gediğine mutasarrıf oldukları bir bâb francalacı fırını derûnunda francala tabh ile ibâdullâha füruht ve ta‘ayyüş ederler iken fırın-ı mezbûr yedi aded fırınlar ile ma‘an sedd ü bend olunduğundan kendilerine gadr olduğunu beyân birle hâllerine merhameten fırın-ı merkūm küşâd ve francala tabhıyla ta‘ayyüş etmeleri için ruhsat i‘tâsını istid‘â etmeleriyle Hazîne-i âmiremde mahfûz Başmuhâsebe defterlerine mürâca‘at olundukda seyyidetü’l-muhadderât, iklîletü’l-muhassenât, tâcü’l-mestûrât, zâtü’l-alâ ve’s-sa‘âdât Hadîce Sultân -dâmet iffetuhâ ve zâdet ismetühâ-nın Sultân Mehmed Câmi‘-i şerîfi kurbünde Malta Çarşısı’nda mutasarrıfe olduğu ekmekci fırınında emsâli üzere francala tabh ve i‘mâli lede’l-istid‘â fırın-ı mezbûr müddet-i medîde harâb ve değirmeni dahi mu‘attal olduğundan âhar fırına rabt ile mu‘attal kaldığı lede’l-ihbâr istid‘âsı üzere fırın-ı mezbûr ekmekci fırını olmak üzere mukayyed olan kaydı terkīn olunup emsâli üzere kıyyelik francalacı fırınlarına ilhâk olunmak üzere [bin] iki yüz on sekiz târihinde İstanbul Kādısı bulunan Selim’in i‘lâmı mûcebince müşârün-ileyhâ tarafına emr-i şerîf verildiği ba‘de’l-ihrâc sen ki mevlânâ-yı mûmâ-ileyhsin, sana havâle olundukda; bir buçuk sene mukaddem İstanbul ve havâlîsinde mahâll-i ma‘lûmede yedi aded francalacı fırınları ibkā ve mâ‘adâsı bâ-irâde-i şâhânem sedd ü bend olundukdan sonra bundan akdemce vâlid-i mâcid-i şehriyârânem Hudâvendigâr-ı esbak merhûm ve mağfûrun-leh Sultân Abdülhamid Han -tâbe serâh-ün Beylerbeyi ve Mîrgûnoğlu nâm mahallerde müceddeden inşâ ve ihyâsına muvaffak olduğu cevâmi‘-i şerîfe ve âsâr-ı celîlesi evkāfından mahalleyn-i merkūmeynde iki aded ve Gümrükcü Çiftliği’nde bir aded ve Çelebi Hasan Paşa Vakfı’ndan Kumkapı hâricinde bir aded ve gerek mahâll-i sâire-i ma‘lûmede mesdûd olan fırınlardan ba‘zılar[ının] küşâdına irâde-i seniyyem ta‘alluk birle ol bâbda şeref-yâfte-i sudûr olan hatt-ı hümâyûn-ı şevket-makrûnum mûcebince bâ-evâmir-i aliyyem küşâdlarına ruhsat verilmiş olmağla ber-mûceb-i derkenâr müşârün-ileyhâ Hadîce Sultân -dâmet ismetühâ ve zâdet iffetuhâ-nın mutasarrıfe olduğu İstanbul’da Malta Çarşısı’nda kâin francalacı fırınının müste’cirleri mesfûrânın istid‘â eyledikleri küşâdı husûsu ancak irâde-i şâhâneme <> menût mevâddan olup hatt-ı hümâyûn-ı şevket-makrûnum sudûruna mütevakkıf idiğin memhûren i‘lâm eylediğin ecilden i‘lâmı[n mûcebince] ve sâire sirâyet etmemek üzere ruhsatı hâvî sudûr eden hatt-ı hümâyûn-ı şâhânem mantûku üzere fırın-ı mezbûrun küşâdı için fermân-ı âlî-şânım sâdır olmuşdur. Buyurdum ki: Hükm-i şerîfim vardıkda bu bâbda sâdır olan emrim üzere amel edip dahi şeref-yâfte-i sudûr olan hatt-ı hümâyûn-ı şevket-makrûnum mûcebince fırın-ı mezbûrun küşâdı için ruhsatı hâvî sâdır olan işbu emr-i celîlü’ş-şân-ı vâcibü’l-ittibâ‘ ve lâzımü’l-imtisâlimin mazmûn-ı münîfi birle âmil olup hilâfına rızâ ve cevâz göstermeyesin. Şöyle bilesin alâmet-i şerîfe i‘timâd kılasın. Tahrîren fi’l-yevmi’s-sâlis [min]-şehri Rebî‘i’l-evvel sene erba‘a ve işrîn ve mieteyn ve elf. Kostantıniyyeti’l-mahrûse