İstanbul Mahkemesi 97 Numaralı Sicil (H.1217-1225 / M. 1802-1810) cilt: 83, sayfa: 452 Hüküm no: 334 Orijinal metin no: [122b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Terzilerin kadın feracelerini eski tarzda dikmeleri gerektiği Telli ve pullu ferâce yasağı. Bâ-sah. İstanbul Kādısı Fazîletlü Efendi Nisvân tâifesinin heyet ve libâs ve kıyâfetlerinde şerâit-i edebe ri‘âyet ederek sefâhatı müstelzim harekâtı tecvîz etmemeleri lâzımeden iken süfehâ-yı nisvândan ba‘zıları ferâceleri yakalarına tel ve pul diktirip bî-edebâne esvâk ve pazarda geşt ü güzâr eyledikleri tahkīk olunmağın bu misillü hâlât-ı gayr-ı lâyıkanın men‘i lâzımeden olduğundan fîmâ-ba‘d nisvân tâifesi ferâceleri kānûn-ı kadîm ve edebe mugāyir sûretde heyet ve dikişli olmamak ve tel ve pul dikilmemek üzere bi’l-cümle terzi esnâfına tenbîh ve te’kîd olunması bu def‘a beyâz üzerine mahsûs fermân-ı âlî ısdârıyla Terzibaşı’ya tenbîh olunmuş olmağla imdi siz dahi bi’l-cümle mahallât imâmlarını celb edip fîmâ-ba‘d nisvân tâifesinden şerâit-ı edebe mugāyir heyet ve kıyâfetle esvâk ve pazarda geşt ü güzâr edenler muhkem tedîb olunacaklarını mahalleleri ahâlîsine tefhîm etmek üzere cümlesine tenbîhe mübâderet eyleyesiz deyü. Fî 25 Ra sene [12]24