İstanbul Mahkemesi 97 Numaralı Sicil (H.1217-1225 / M. 1802-1810) cilt: 83, sayfa: 459 Hüküm no: 340 Orijinal metin no: [124a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Rusya üzerine sefere çıkacak Osmanlı ordusunun ekmek ihtiyacının karşılanması için 30 adet ekmekçi çadırı ve ekmekçiler hazırlanması Ordu-yı hümâyûna nân-ı azîz tertîbi. Akzâ kuzâtü’l-Müslimîn, evlâ vülâti’l-muvahhidîn, ma‘denü’l-fazli ve’l-yakīn, râfi‘u a‘lâmi’ş-şerî‘ati ve’d-dîn, vârisü ulûmü’l-enbiyâi ve’l-mürselîn, el-muhtassu bi-mezîd-i inâyeti’l-Meliki’l-mu‘în mevlânâ İstanbul Kādısı -zîdet fezâilühû- ve iftihârü’l-ümerâi ve’l-ekâbir, müstecmi‘u cemî‘i’l-ma‘âlî ve’l-mefâhir, el-muhtassu bi-mezîd-i inâyeti’l-Meliki’l-kādir bi’l-fi‘il Dergâh-ı mu‘allâm Yeniçeriler Ağası Hasan -dâme ulüvvuhû- ve mefâhirü’l-emâsil ve’l-akrân esnâf kethudâsı ve yiğitbaşı ve sâir -zîde kadrühum- tevkī‘-i refî‘-i hümâyûn vâsıl olucak ma‘lûm ola ki El-hâletü-hâzihî Rusyalu üzerine şer‘an sefer-i hümâyûnum iktizâ eylediğine binâen bi-tevfîkıhî sübhânehû ve te‘âlâ işbu sene-i mübâreke mâh-ı Cumâdelûlâ’sının gurresi günü ihrâcı musammem olan ordu-yı hümâyûnumda mevcûd cünûd-i muvahhidîne rûz-merre verilmesi iktizâ eden nân-ı azîzin tabhı için esfâr-ı sâbıkada de’b ve mu‘tâd olduğu vechile müstevfî amele ve mühimmât-ı sâire ile kadr-ı vâfî habbâzân fırınlarının şimdiden tertîb ve tanzîmlerinden lâ-büd ve lâzım ve muktezâ-i râbıta-i nizâmları üzere ma‘rifet-i şer‘ ve esnâf kethudâları ve nizâm ustaları ittifâk ve ma‘rifetleriyle bi’t-taharrî tâife-i Ermeniyândan intihâb ve tedârük ve isim ve şöhret ve kefîlleri tescîl birle tekmîl ve ihzârı mühim ve mu‘tâd olup ustaları gibi amelesini dahi Ermeni milletinden ve ser-habbâz ve ikinci ve üçüncü usta nasb ve iktizâ eden hıyâm ve ustaları işciyân neferâtıyla hazır u âmâde olmak ve tertîb-i sâbıklarına göre her haymede ale’d-devam üçer fırın i‘mâl olunmak üzere otuz aded hıyâmın doksan fırın i‘tibârıyla cânib-i mîrîden beher fırına mu‘ayyen olan iki yüz guruş mühimmât-bahâ ve li-ecli’l-i‘âne ücret-i tabhıyelerine mahsûben yüzer guruş hesâbıyla min-haysü’l-mecmû‘ yirmi yedi bin guruş verilmek lâzım gelip ve işcileri her bir fırına dörder neferden üç yüz altmış nefer olmak üzere tertîbine irâde-i aliyyem ta‘alluk etmekle bi-avnihî sübhânehû ve te‘âlâ ordu-yı hümâyûn-ı nusret-makrûnumda cünûd-i muvahhidînin ta‘yînât-ı mühimmeleri için iktizâ eden nân-ı azîz tabhında mikdâr-ı zerre sıklet çekilmemek ve ba‘zan içlerinden hıyânet ve mel‘anete cür’et ederi olur ise levâzım-ı tedîbleri icrâ olunmak ve ordu-yı hümâyûnumdan firâr ile tedîbleri icrâ olunamadığı hâlde Âsitâne-i sa‘âdetimde rufekā ve küfelâları muâhaze ve mu‘âteb olacakların bilip ona göre hizmetlerinde devam ve istikāmet eylemeleri için siz ki mevlânâ ve ağa-yı müşârün-ileyhimâsız, inzimâm-ı re’y ve ma‘rifetiniz ile esnâf-ı mezkûrenin kethudâ ve yiğitbaşı ve nizâm ustaları ve ihtiyârları meclis-i şer‘a cem‘ ve ihzâr ve ol mikdâr hıyâmın iktizâ eden ustaları ve işcileri ve sâir mühimmâtları vech-i meşrûh üzere esnâflarının mu‘teber [124b] ve mütemevvil ve sahib-i sermâye gediklülerinin Ermeni tâifesinden intihâb ve rufekā ve kefîlleri mu‘âyene ve tescîl olunarak ta‘yîn ve ol mikdâr işcilerinin bir neferi firâr etmemek şartıyla iktizâsına göre beyne’l-esnâf kavî kefîlleri alınarak cümlesi kethudâ ve yiğitbaşı ve nizâm ustalarının kefâletleriyle istihdâm olunup eğer firâr ve gaybûbet ve sâir gûne muhtellü’n-nizâm hareket ederi olur ise cümle ittifâkıyla muktezâ-yı tedîbleri icrâ olunmak misillü şurût u kuyûd ve mu‘âhedeleri şîrâze-bend-i hüsn-i hitâm oldukdan sonra ta‘ahhüdleri ale’t-tafsîl hüccet-i şer‘iye olunup hîn-i ihtiyâcda mürâca‘at için Mevkūfât defterlerine sebt ü kayd ve ba‘dehû beher haymeye cânib-i mîrîden i‘tâ olunacak dokuz yüz guruş tabhıye ve mühimmât-bahâları ordu-yı hümâyûnum Nüzûl emîni ve Mevkūfât’dan ta‘yîn olunacak Nüzûl kâtibi ma‘rifetleriyle tevzî‘ ve Mevkūfât’a kayd için birer mühürleri i‘tâ olunmak üzere habbâzân ustaları ve işcileriyle ma‘an hazır u âmâde ettirilmesi husûsunun tanzîmine sa‘y ve dikkat olunmak fermânım olmağın işbu emr-i celîlü’l-kadrim ısdâr ve ( ) ile irsâl olunmuşdur. İmdi vusûlünde bâlâda tafsîl ü beyân olunduğu vechile amel ve hareket ve tesviye ve tanzîmine himmet ve der-akab bi’l-cümle mühimmâtlarıyla hıyâmları tekmîl olarak usta [ve] işcileriyle ma‘an ordu-yı hümâyûnumda mevcûd bulunması husûsuna müsâra‘at ve ta‘yîn olunacak ser-habbâz ve ustaların ism ü resmleriyle hüccet-i şer‘iyesin i‘tâya mübâderet eyleyesiz ve siz ki esnâf kethudâsı ve yiğitbaşı ve sâirlerisiz, siz dahi mûceb-i emr-i şerîfimle amel ve hareket eylemeniz bâbında fermân-ı âlî-şânım sâdır olmuşdur. Buyurdum ki: Hükm-i şerîfimle ( ) vardıkda bu bâbda vech-i meşrûh üzere şeref-yâfte-i sudûr olan işbu emr-i şerîf-i celîlü’ş-şân-ı vâcibü’l-ittibâ‘ ve lâzımü’l-imtisâlimin mazmûn-ı itâ‘at-makrûnu üzere âmil olasız. Şöyle bilesiz alâmet-i şerîfe i‘timâd kılasız. Tahrîren fi’l-yevmi’s-sâbi‘-aşer [min]-Rebî‘i’l-lâhir sene erba‘a [ve] işrîn ve mieteyn ve elf. Kostantıniyye-i mahrûse