İstanbul Mahkemesi 97 Numaralı Sicil (H.1217-1225 / M. 1802-1810) cilt: 83, sayfa: 457 Hüküm no: 339 Orijinal metin no: [123b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Orducu esnafı tayini ve defteri Ordu-yı hümâyûna esnâf tertîbi. Akzâ kuzâtü’l-Müslimîn, evlâ vülâti’l-muvahhidîn, ma‘denü’l-fazli ve’l-yakīn, râfi‘u a‘lâmi’ş-şerî‘ati ve’d-dîn, vârisü ulûmü’l-enbiyâi ve’l-mürselîn, el-muhtassu bi-mezîd-i inâyeti’l-Meliki’l-mu‘în mevlânâ İstanbul Kādısı -zîdet fezâilühû- ve iftihârü’l-ümerâi ve’l-ekâbir, müstecmi‘u cemî‘i’l-ma‘âlî ve’l-mefâhir, el-muhtassu bi-mezîd-i inâyeti’l-Meliki’l-kādir Dergâh-ı mu‘allâm Yeniçerileri Ağası el-Hâc Mehmed -dâme ulüvvuhû- ve kıdvetü’l-emâcid ve’l-a‘yân Ordu Ağası -zîde mecduhû- ve mefâhirü’l-emâsil ve’l-akrân esnâf kethudâları ve ihtiyârları ve üstâdları -zîde kadrühum- tevkī‘-i refî‘-i hümâyûn vâsıl olucak ma‘lûm ola ki Bu esnâda Moskov keferesi ve müttehidi olan Sırplu havenesi bilâd-ı İslâmiyeye sû-i kasd ve ihânete ibtidâr eylediğine binâen şân ve şevket-i İslâmiyeyi icrâ ve dînimiz dîn-i mübîn-i hazret-i Muhammediyeyi te’yîd ve i‘lâ niyet-i hâlisasıyla bu esnâda müsta‘înen billâhi te‘âlâ Dersa‘âdet’imden ihrâc olunacak ordu-yı hümâyûnumda tecemmu‘ edecek asâkir-i muvahhidînin iktizâ eden malzemeleri tedârükünde zarûret ve muzâyaka çekilmemek için esfâr-ı sâbıkada olageldiği üzere ordu-yı zafer-makrûnumda mevcûd bulunmak üzere hırfet esnâfının aynı orduları ihrâcı lâzımeden olmağla Mevkūfât’dan ihrâc ve derûn-ı emr-i şerîfime mevzû‘an irsâl olunan memhûr ve mumzâ sûret-i defter mûcebince İstanbul’da vâki‘ yirmi sekiz aded hırfetin iktizâ eden masrafları beynlerinde mer‘î tutulan yamaklarının birbirlerine imdâd ve i‘âne ile gördürülüp tamamen haymeleri ihrâc ve ordu-yı hümâyûnum hareketinden mukaddem Davutpaşa Sahrâsı’nda mevcûd ve âmâde ettirmeğe ziyâde ihtimâm ve dikkat olunmak fermânım olmağın hâssaten işbu emr-i celîlü’l-kadrim ısdâr ve ( ) ile irsâl olunmuşdur. İmdi vusûlünde siz ki mevlânâ ve ağa-yı müşârün-ileyhimâsız, ber-vech-i muharrer ordu-yı hümâyûnumda mevcûd bulunmak için Âsitâne-i aliyyemden ihrâcı tertîb olunan ol mikdâr hırfetlerinin tanzîmine bi’l-ittifâk sa‘y ü gayret ve esfâr-ı sâbıkaya makīs olmayıp serî‘an tanzîmleri lâzımeden idiğini tenbîh ve te’kîde mübâderet eyleyesiz ve siz ki Ordu Ağası ve esnâf kethudâları mûmâ-ileyhim ve sâirlerisiz, siz dahi mûceb-i emr-i şerîfimle amel ve hareket eylemeniz bâbında fermân-ı âlî-şânım sâdır olmuşdur. Buyurdum ki: [124a] Hükm-i şerîfimle ( ) vardıkda bu bâbda vech-i meşrûh üzere şeref-yâfte-i sudûr olan işbu emr-i şerîf-i celîlü’ş-şân-ı vâcibü’l-ittibâ‘ ve lâzımü’l-imtisâlimin mazmûn-ı münîfi üzere âmil olasız. Şöyle bilesiz alâmet-i şerîfe i‘timâd kılasız. Tahrîren fi’l-yevmi’s-sâdis-aşer [min]-Rebî‘i’l-âhir sene erba‘a [ve] işrîn ve mieteyn ve elf. Kostantıniyye-i mahrûse *** Ordu-yı hümâyûna esnâf tertîbi defteri. Defter-i tertîb-i ihrâc kerde-i orducuyân-ı esnâf-ı mezkûre an-cânib-i şehr-i mezkûre berây-ı sefer-i hümâyûn ihrâc şüde kayd ve sûret dâde fermûde bâ-telhîs [ve] fermân-ı âlî, fî 13 R sene 1224. An-cânib-i Mahrûse-i İstanbul Hırfet-i hallâcân Hayme: 2 aded Hırfet-i şemşîrgerân Hayme: 2 aded Hırfet-i kemângerân Hayme: 2 aded Hırfet-i semerciyân Hayme: 3 aded Hırfet-i arpacıyân Hayme: 4 aded Hırfet-i sarrâcân Hayme: 4 aded Hırfet-i bezzâzân Hayme: 4 aded Hırfet-i eskiciyân Hayme: 4 aded Hırfet-i berberân Hayme: 6 aded Hırfet-i nalbandân Hayme: 4 aded Hırfet-i mumcuyân Hayme: 2 aded Hırfet-i başcıyân Hayme: 2 aded Hırfet-i nalçacıyân Hayme: 4 aded Hırfet-i attarân Hayme: 4 aded Hırfet-i bakkālân Hayme: 4 aded Hırfet-i mûytâbân Hayme: 4 aded Hırfet-i aşcıyân Hayme: 2 aded Hırfet-i hayyâtân Hayme: 3 aded Hırfet-i haffâfân Hayme: 8 aded Hırfet-i çukacıyân Hayme: 2 aded Hırfet-i gazzazân Hayme: 2 aded Hırfet-i câmeşûycuyân Hayme: 3 aded Hırfet-i kassâbân Hayme: 2 aded Hırfet-i çadırcıyân Hayme: 1 aded Hırfet-i demirciyân Hayme: 1 aded Hırfet-i kalaycıyân Hayme: 1 aded Hırfet-i habbâzân Hayme: 4 aded Hırfet-i kazgancıyân Hayme: 1 aded Cem‘an yekûn Hırfet: 28 aded Hayme: 85 aded Fî 13 R sene [1]224