İstanbul Mahkemesi 97 Numaralı Sicil (H.1217-1225 / M. 1802-1810) cilt: 83, sayfa: 505 Hüküm no: 374 Orijinal metin no: [135a-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Rusya üzerine sefere çıkacak Osmanlı ordusu için 42 adet Sirem arabası hazırlanması Ordu-yı hümâyûna Sirem arabaları tanzîmi. Akzâ kuzâtü’l-Müslimîn, evlâ vülâti’l-muvahhidîn, ma‘denü’l-fazli ve’l-yakīn, râfi‘u a‘lâmi’ş-şerî‘ati ve’d-dîn, vârisü ulûmü’l-enbiyâi ve’l-mürselîn, el-muhtassu bi-mezîd-i inâyeti’l-Meliki’l-mu‘în mevlânâ İstanbul Kādısı -zîdet fezâilühû- ve iftihârü’l-emâcid ve’l-ekârim, câmi‘ü’l-mahâmid ve’l-mekârim, el-muhtassu bi-mezîd-i inâyeti’l-Meliki’d-dâim Dergâh-ı mu‘allâm Sekbânbaşısı ( ) -dâme mecduhû- tevkī‘-i refî‘-i hümâyûn vâsıl olucak ma‘lûm ola ki Siz ki mevlânâ ve sekbânbaşı-i mûmâ-ileyhimâsız fe-lillâhi’l-hamdü ve’l-minne işbu sene-i mübârekede düşman-ı dînimiz olan Moskov keferesiyle vukū‘ bulan muhârebelerde her bâr galebe ve nusret asâkir-i nusret-meâsirim tarafında vâki‘ olduğu nümûdâr ise dahi bi-avnihî sübhânehû ve te‘âlâ sene-i âtiyede dahi kefere-i makhûre-i mersûmeden fevka’l-matlûb ahz-ı intikām olunmak için sefer-i hümâyûnum muhakkak olduğuna binâen bi’l-yümni ve’l-ikbâl ordu-yı hümâyûnumun evvel-bahârda meştâdan sahrâya hurûcunda ma‘iyyetinde mevcûd bulunup hidemât-ı lâzımede istihdâm olunmak için sâbıkı mûcebince bin iki yüz yirmi beş senesine mahsûben dahi Başmuhâsebe’den ihrâc ve derûn-ı emr-i şerîfime mevzû‘an irsâl olunan sûret-i defter mûcebince Âsitâne-i aliyyemden kırk iki kıt‘a Sirem arabaları tertîb olunmuş olmakdan nâşî zikrolunan arabaların yola girdikleri günden i‘tibâren ber-vech-i mu‘tâd îcâb eden ücretleri Ordu-yı hümâyûnum Arabacıbaşısı yedinden verilmek şartıyla şimdiden tehyie ve tedârük ve bi-mennihî te‘âlâ sene-i mezbûre nevrûz-ı fîrûzunda Şumnu Sahrâsı’nda mevcûd ve hazır u âmâde olunmak için vakt-i mezkûrdan evvelce irsâline dikkat olunmak fermânım olmağın hâssaten işbu emr-i âlî-şânım ısdâr ve ( ) ile irsâl olunmuşdur. İmdi vusûlünde bâlâda bast u beyân ve sûret-i defterde tasrîh u ayân kılındığı vechile sâlifü’z-zikr kırk iki kıt‘a Sirem arabasının bargirleri güçlü ve kuvvetlü ve tüvânâ olarak tedârük ve nevrûzda Şumnu Sahrâsı’nda mevcûd bulunmak üzere vakt-i mezkûrdan mukaddemce irsâl ve tesyîrine kemâl-i ihtimâm ve dikkat ve hilâfından tehâşî ve mücânebet eylemeniz bâbında fermân-ı celîlü’ş-şânım sâdır olmuşdur. Buyurdum ki: Hükm-i şerîfimle ( ) vardıkda bu bâbda vech-i meşrûh üzere şeref-yâfte-i sudûr olan işbu emr-i şerîf-i celîlü’ş-şân-ı vâcibü’l-ittibâ‘ ve lâzımü’l-imtisâlimin mazmûn-ı itâ‘at-makrûnu üzere âmil olup hilâfı gûne vaz‘ ve hâlâtı tecvîzden be-gāyet tehâşî ve mücânebet eyleyesiz. Şöyle bilesiz alâmet-i şerîfe i‘timâd kılasız. Tahrîren fi’l-yevmi’l-hâmis min-şehri Şevval sene erba‘a ve işrîn ve mieteyn ve elf. Be-meştâ-yı Ruscuk *** Sûret. Berây-ı lâzıme-i istihdâm şüde der-sefer-i hümâyûn-ı nusret-makrûn der-cânib-i Moskov ki berây-ı sene 1225 ân kadar arabahâ-i Sirem an-cânib-i Âsitâne-i sa‘âdet tedârük ve ihrâc ve be-Ser-araba-i Sirem-i Ordu-yı hümâyûn teslîm şüde fermûde ber-mûceb-i defter-i dâde ve telhîs ve fermân-ı âlî fî 14 L. sene 1224 ve bâ-fermân-ı şerîf. An-cânib-i Âsitâne-i sa‘âdet Arabahâ-i Sirem Kıta‘ât: 42 Fî 14 L. sene 1224