İstanbul Mahkemesi 97 Numaralı Sicil (H.1217-1225 / M. 1802-1810) cilt: 83, sayfa: 506 Hüküm no: 375 Orijinal metin no: [135b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Rusya üzerine sefere çıkacak olan Osmanlı ordusu için ekteki defterde yazılı olan miktarlarda marangoz, lağımcı, taşçı, taşkırıcı, su yolcu ve lağım hazineci hazırlanması Ordu-yı hümâyûna neccârân ve lağımcıyân ve taşcıyân ve suyolcuyân tanzîmi. Akzâ kuzâtü’l-Müslimîn, evlâ vülâti’l-muvahhidîn, ma‘denü’l-fazli ve’l-yakīn, râfi‘u a‘lâmi’ş-şerî‘ati ve’d-dîn, vârisü ulûmü’l-enbiyâi ve’l-mürselîn, el-muhtassu bi-mezîd-i inâyeti’l-Meliki’l-mu‘în mevlânâ İstanbul Kādısı -zîdet fezâilühû- ve mefâhirü’l-emâcid ve’l-a‘yân hâssam mi‘mârbaşısı ve su nâzırı ( ) ve lağımcıbaşı vekîli ( ) -zîde mecdühüm- tevkī‘-i refî‘-i hümâyûn vâsıl olucak ma‘lûm ola ki Fe-lillâhi’l-hamdü ve’l-minne, işbu sene-i mübârekede düşman-ı dînimiz olan Moskov keferesiyle vukū‘ bulan muhârebede galebe ve nusret asâkir-i zafer-meâsirim tarafında vâki‘ olmuş ise de bi-avnihî Sübhânehû ve te‘âlâ sene-i âtiyede dahi kefere-i menhûseden ahz-ı intikām olunmak niyet-i hâlisasıyla sefer-i hümâyûnum muhakkak olduğuna binâen ordu-yı hümâyûnumda mevcûd bulunmak için sâbıklarına kıyâsen tertîb olunan ma‘a-kalfa otuz nefer neccârân ve elli nefer lağımcıyân ve on nefer taşcıyân ve taş kırıcı ve on beş nefer ma‘a-ocaklık suyolcuyân ve ma‘a-zam otuz nefer lağım hazîneciyân neferâtları Mevkūfât’dan ihrâc ve derûn-ı emr-i şerîfime mevzû‘an irsâl olunan sûret-i defter mûcebince ihrâcı lâzım gelmekle sâbıkı mûcebince ocaklık suyolcularından mâ‘adâ yüz yirmi nefer esnâf-ı amelenin iktizâ eden ücretleri verilmek şartıyla mecmû‘u tekmîl âlât ü bisâtlarıyla siz ki mevlânâ ve mâssam mi‘mârı ve su nâzırı ve lağımcıbaşı vekîli mûmâ-ileyhimsiz, ma‘rifetiniz ile yarar kefîlleri tutulup ma‘rifet-i şer‘le eşkâl ve şöhretleri ve sâkin oldukları mahalleri ile ale’l-esâmî tahrîr ve defter olup mahâlline kayd için memhûr ve mümzâ defteri takdîm ve kendileri ta‘yîn olunmak fermânım olmağın hâssaten işbu emr-i şerîfim ısdâr ve ( ) ile irsâl olunmuşdur. İmdi vusûlünde bâlâda bast u beyân olunduğu üzere neferât-ı merkūmeyi tertîb ve tanzîm ile evvel-bahâr-ı huceste-âsârda ordu-yı hümâyûnum meştâ-yı hümâyûnumdan sahrâya hurûcunda mevcûd bulunmaları husûsuna cümleniz sa‘y-i belîğ eylemeniz bâbında fermân-ı âlî-şânım sâdır olmuşdur. Buyurdum ki: Hükm-i şerîfimle ( ) vardıkda bu bâbda vech-i meşrûh üzere şeref-yâfte-i sudûr olan işbu emr-i şerîf-i celîlü’ş-şân-ı vâcibü’l-ittibâ‘ ve lâzımü’l-imtisâlimin mazmûn-ı münîfi birle âmil olasız. Şöyle bilesiz alâmet-i şerîfe i‘timâd kılasız. Tahrîren fi’l-yevmi’l-âşir [min]-şehri Zilka‘de li-sene erba‘a ve işrîn ve mieteyn ve elf. Be-meştâ-yı Şumnu *** Sûret-i defter. Defter-i tertîb-i ihrâc kerde-i neccârân ma‘a-kalfa ve lağımcıyân ve taşcıyân ve taş kırıcıyân ve hazîneciyân-ı lağımcı ve suyolcuyân ma‘a-ocaklık berây-ı sene bin iki yüz yirmi beş der-sefer-i hümâyûn an-cânib-i Moskovlu el-vâki‘ der-sene 1224 Berây-ı neccârân ma‘a-kalfa Neferen: 30 Berây-ı lağımcıyân Neferen: 50 Berây-ı taşcıyân ve taş kırıcı Neferen: 10 Berây-ı suyolcuyân ma‘a-ocaklık Neferen: 15 Berây-ı hazîneciyân-ı lağım Neferen: 15 Zam: 15 [Toplam]: 30 Cem‘an yekûn Neferen: 135 Berây-ı ocaklık ma‘a-suyolcu Neferen: 5 Berây-ı sâire Neferen: 130 Tahrîren fî 7 Za sene 1224