İstanbul Mahkemesi 97 Numaralı Sicil (H.1217-1225 / M. 1802-1810) cilt: 83, sayfa: 516 Hüküm no: 383 Orijinal metin no: [137b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ordu için defterde yazılı olan miktarlarda duvarcı, marangoz, lağım hazineci, lağımcı, taş yonucu, taş kırıcı ve su yolcu hazırlanması Sûret-i defter. Berây-ı tedârük ve irsâl şüde-i amelehâ-i mezkûrân lâzıme-i istihdâm şüde ba‘zı hidemât der-ordu-yı hümâyûn-ı nusret-makrûn ki be-ma‘rifet-i Mustafa Ağa ser-mi‘mârân-ı hâssa tedârük ve be-ordu-yı hümâyûn-ı nusret-makrûn irsâl şüde sûret dâde fermûde el-vâki‘ der-sene 1224 ber-mûceb-i hülâsa-i tahrîrât-ı hazret-i sadâret-penâhî ve derkenâr ve takrîr ve fermân-ı âlî fî 3 M sene 1225 ve bâ-fermân-ı şerîf. Duvarcı 20 nefer Neccâr ma‘a-kalfa 20 nefer Hazîneci 30 nefer Müslim lağımcı 30 nefer Re‘âyâ lağımcı 10 nefer Taş yonucu ve taş kırıcı 10 nefer Suyolcuyân ma‘a-ocaklık 15 nefer [Toplam]: 135 *** Ordu-yı hümâyûna neccâr ve taşcı ve suyolcu ve sâir için ilmühaber kāimesi. Taraf-ı hazret-i Sadâret-penâhî’den vürûd ile huzûr-ı hümâyûna lede’l-arz bâlâları hutût-ı hümâyûn ile muvaşşah olan tahrîrât-ı seniyyeden mi‘mârân ma‘rifetiyle iktizâ-yı nizâmına müsâra‘at olunmak bâbında fermân-ı âlî sudûruyla havâle buyrulan bir maddenin müzekkiresinde ordu-yı hümâyûnun Dersa‘âdet’den hurûcunda Ordu Mi‘mârbaşısı Halil Efendi ma‘iyyetiyle istishâb olunan otuz nefer neccâr ve on nefer taşcı amelelerinin ekserisi firâr ile el-yevm on kadar neccâr kalmış idiğinden bahisle evvel-bahârda ma‘iyyet-i ordu-yı hümâyûnda istihdâm olunmak ve neccâr esnâfından kā‘ide-i kadîm üzere verilecek imdâdiye duvarcılara i‘tâ kılınmak üzere yalnız elli nefer duvarcı ve zimmî olarak kırk nefer lağımcı ile iki nefer mi‘mâr halîfesi ta‘yîn ve irsâl olunmasını nâtık efendi-i mûmâ-ileyhin takdîm etmiş olduğu takrîri Der-aliyye’ye irsâl olduğu beyânıyla husûs-ı mezkûrun Mi‘mâr Ağa’ya havâle ile tanzîmi iktizâ-yı maslahatdan idiğini müşârün-ileyh hazretleri tahrîr ve iltimâs buyurmalarıyla kuyûda lede’l-mürâca‘a bundan akdem ordu-yı hümâyûnun hurûcunda ma‘iyyet-i ordu-yı hümâyûnda istihdâm olunmak üzere tertîb olunan bir nefer neccâr kalfası ve yirmi dokuz nefer neccâr ve on nefer taşcı ki cem‘an kırk nefer amelenin beherine harc-ı râh olarak kırkar guruşdan bin altı yüz guruş ve seksen nefer lağımcıyân amelesinin üçer aylık ücretleri olmak üzere beherine seksener guruşdan üç bin iki yüz guruş ki cem‘an dört bin sekiz yüz guruş ücret [ve] harc-ı râhlarının Darbhâne-i âmirede olan seferiye akçesinden i‘tâsı için sûret ve tezkiresi ve neferât-ı merkūmeden firâr ve gaybet ederi olur ise kendilerine verilen mal-ı mîrîyi kethudâ ve yiğitbaşıları, bizler tazmîn ederiz, deyü müte‘ahhid olduklarına binâen verdikleri ta‘ahhüd temessükleri mûcebince sûretleri verilmiş olduğu Başmuhâsebe’den ba‘de’l-ihrâc iktizâ-yı nizâmı ser-mi‘mârân-ı mûmâ-ileyhden isti‘lâm olundukda; vech-i muharrer üzere bu def‘a tanzîmine irâde-i aliyye ta‘alluk eden ma‘a-kalfa otuz nefer neccâr ve elli nefer lağımcı ve otuz nefer hazîneci ve on nefer taş yonucu ile taş kırıcı ve on beş nefer ma‘a-ocaklık suyolcu ki cem‘an yüz otuz nefer esnâf-ı ameleyi tedârük etmekde olup ancak ordu-yı hümâyûnda muktezî olan hidemâtda beher hâl neccâr amelesi lâzım olduğundan fakat yirmi nefer duvarcı ma‘a-kalfa ve yirmi nefer neccâr ve otuz nefer Müslim [138a] on nefer zimmî ki cem‘an kırk nefer lağımcı ve otuz nefer hazîneci ve on nefer taş yonucu ve taş kırıcı ve on beş nefer ma‘a-ocaklık suyolcu ameleleri ki min-haysü’l-mecmû‘ yüz otuz beş esnâf-ı amele tertîb ve tedârükü husûsuna irâde-i seniyye ta‘alluk eder ise Başmuhâsebe’ye ba‘de’l-kayd bir kıt‘a sûret ve Mi‘mâr halîfelerinden Seyyid Salih ve Kâmî Çerâğı Mehmed Halîfe el-yevm Dersa‘âdet’de mevcûd olmağla merkūmânın me’mûriyetlerini hâvî isimleri tasrîh olunarak bir kıt‘a Dîvân tezkiresi i‘tâsı husûslarını re’y-i âlîye ihâle ile memhûren i‘lâm etmekle mûcebince tanzîmi husûsu bâ-takrîr lede’l-arz mûcebince ba‘de’t-tanzîm ordu-yı hümâyûna gönderilmek üzere bâ-takrîr inhâ ve ifâdeye mübâderet olunmak bâbında fermân-ı âlî sâdır olmağın mûcebince halîfe-i merkūmânın me’mûriyetleri için Dîvân tezkiresi tahrîr olunup Başmuhâsebe’ye kayd ve sûret ve ordu-yı hümâyûna ilmühaberi verilmek fermân buyurulmağın mûcebince kaydolunup ordu-yı hümâyûna ilmühaberi verilmekle [Ser]-mi‘mârân-ı mûmâ-ileyh ma‘rifetiyle amele-i mezkûreyi tedârük ve ordu-yı hümâyûna irsâli için işbu sûret verildi. Fî 5 M sene [1]225