İstanbul Mahkemesi 97 Numaralı Sicil (H.1217-1225 / M. 1802-1810) cilt: 83, sayfa: 520 Hüküm no: 387 Orijinal metin no: [138b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. İstanbul’a gemilerle gelen tuzun doğru Hasır İskelesi’ne getirilip satılması, vurguncuların gemileri daha önce karşılayıp gizlice denizde tuz alış-verişi yapmaması Bâ-sah. İstanbul Kādısı Fazîletlü Efendi Taşra gidecek tuz ile Âsitâne-i aliyyede i‘mâl olunacak tuzun bey‘ u şirâsı husûsunda nizâm-ı kadîmlerine mugāyir muhtekir tâifesinin te‘addîlerine binâen bu keyfiyet ihtilâl-i nizâmı bâdî olduğundan mâ-tekaddemden beri tüccâr ve Efrenc tâifesinin taşradan Der-aliyye’ye vürûd eden tuz sefîneleri doğru Hasır İskelesi’ne gelip hamûlesi olan tuz beyâz ve pâk olup Âsitâne-i aliyye harcı ise bir vakıyyesi taşra imrâr ile telef ve ızâ‘at olunmaksızın ashâbı ibâdullâha râyici üzere bey‘ edip eğer tuz redî ve mahlût ise taşraya ve sâir lüzûmu olan mahallere veregelmişler iken bu esnâda mugāyir-i nizâm hareket olunduğundan tuz tedârükünde usret ve husûsan eyyâm-ı şitâda tuz için muzâyaka çekileceği zâhir ü nümâyân olmağın fîmâ-ba‘d taşradan vürûd eden tuz sefîneleri önüne muhtekir tâifesi çıkmayıp ve deryâ yüzünde hufyeten tuz bey‘ u şirâ olunmayıp Akdeniz’den vürûd eden sefîneler doğru Hasır İskelesi’ne gelip Âsitâne-i sa‘âdet harcı olan tuzu tuzcular ve sâir diledikleri ibâdullâha si‘r-i râyici üzere bey‘ eylemeleri ve tuz redî olup Âsitâne harcı olmadığı sûretde iktizâsı Bâb-ı Âlî’ye ifâde olunması husûsuna irâde-i aliyye ta‘alluk etmekle imdi husûs-ı mezkûra ale’d-devam nezâret ve dikkat olunarak halelden vikāyesi husûsuna mübâderet eyleyesiz deyü. Fî 22 M sene [1]225 *** Temme kuyûdü’l-emri’l-âlî Nemekahü’l-fakīru ileyhi -azze şânühu- Mekkî Efendizâde Mustafa Âsım El-kādı bi-Dârü’l-hilâfeti’s-seniyye -gufira lehümâ- ***