İstanbul Mahkemesi 97 Numaralı Sicil (H.1217-1225 / M. 1802-1810) cilt: 83, sayfa: 520 Hüküm no: 386 Orijinal metin no: [138a-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Boş bulunan İstanbul, Üsküdar, Galata, Hasköy ve bağlı yerler Bostancılar Kethudalığına Hassa Kozbekçibaşısı İbrahim’in tayin edildiği Kozbekci beratı. Erbâb-ı istihkākdan hâssam Kozbekcibaşısı işbu râfi‘-i tevkī‘-i refî‘ü’ş-şân-ı hâkānî kıdvetü’l-emâsil ve’l-akrân İbrahim -zîde kadrühû- mübârek Rikâb-ı müstetâbıma arzuhâl sunup İstanbul ve Üsküdar ve Galata ve Hasköy ve tevâbi‘i Bostancıyân kethudâlığına bilâ-ta‘yîn mutasarrıf olan İsmail Kozbekci sâbıkā fevt olup yeri hâlî olmağla mahlûlünden bâ-mukābele-i nân kendine tevcîh ve yedine berat-ı şerîf-i âlî-şânım ihsân olmak bâbında istid‘â-yı inâyet etmeğin şeref-yâfte-i [138b] sudûr olan hatt-ı hümâyûn-ı şevket-makrûnum mûcebince kethudâlık-ı mezkûr müteveffâ-yı merkūmun mahlûlünden mûmâ-ileyhe tevcîh olunmak fermânım olmağın hakkında mezîd-i inâyet-i Pâdişâhânem zuhûra getirip bin iki yüz yirmi beş senesi Muharrem’inin yirminci günü târihiyle müverrah verilen ruûs-ı hümâyûnum mûcebince bu berat-ı hümâyûnu verdim ve buyurdum ki: hâssam Kozbekcibaşısı mûmâ-ileyh İbrahim -zîde kadrühû- varıp müteveffâ-yı merkūmun mahlûlünden kethudâlık-ı mezkûra bilâ-ta‘yîn mutasarrıf olup hizmet-i lâzımesin mer‘î ve müeddâ kıldıkdan sonra işbu berat-ı âlî-şânıma mugāyir bilâ-ta‘yîn kethudâlığı umûruna taraf-ı âhardan müdâhale ve ta‘arruz kılmayalar. Şöyle bileler; alâmet-i şerîfe i‘timâd kılalar. Tahrîren fi’l-yevmi’l-işrîn min-Muharrem sene 1225 Be-makām-ı Kostantıniyyeti’l-mahrûse