İstanbul Mahkemesi 97 Numaralı Sicil (H.1217-1225 / M. 1802-1810) cilt: 83, sayfa: 540 Hüküm no: 404 Orijinal metin no: [144a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. İstanbul ve havalisindeki çörekçi ve simitçilerin, yağlı simit diye düşük gramajlı simit üretmeyip bir ekmeğin yarı ağırlığında has ve pişkin simit üretmeleri Simidcilere dâir buyruldu. Sah. İstanbul Kādısı Fazîletlü Efendi Âsitâne-i sa‘âdet ve civârında vâki‘ Bilâd-ı Selâse ve tevâbi‘inde kâin çörekci ve simidci tâifesinin tabh ve i‘mâl eyledikleri simid hâs ve pişkin olmak üzere vakt ü zamanına göre nân-ı azîzin nısfı vezninde tabh ve i‘mâl olunmak kā‘ide-i kadîmeden ve beher keyl dakīka üç vakıyye yağ vaz‘ıyla tabh olunan yağlı çörek ve yağlı simid dahi nân-ı azîzin sülüsü vezninde hâs ve yağlı ve tâmmü’l-vezn olmak muktezâ-yı şurûtdan iken tâife-i mezbûre i‘mâl eyledikleri simidlere bir mikdâr ziyâde susam vaz‘ıyla yağlı simid diyerek nân-ı azîzin sülüsü vezninde olan yağlı çörek ve yağlı simide kıyâs ederek noksan tabh ve i‘mâle ictisâr ile ibâdullâhı ızrâr eyledikleri meşhûd olmakdan nâşî husûs-ı mezbûr bi’d-defa‘ât iktizâ edenlere tenbîh ve te’kîd olunmuş ise de mütenebbih olmayıp tâife-i merkūme dükkânları ve destgâhlarında bulunmak için beşer onar tâmmü’l-vezn simid i‘mâl ve mâ‘adâ tabla ve küfeler ile esvâk ve pazarda bey‘ eyledikleri simidlere kendi menfa‘atlerine medâr olmak için bir mikdâr ziyâdece susam vaz‘ı hîlesiyle vezninden noksan işlemekde ısrar eyledikleri âşikâr olduğundan tâife-i mezbûre fîmâ-ba‘d o makūle yağlı simid şeklinde nâkısü’l-vezn simid işlemeyip kadîmi üzere susamlıca hâs olarak vaktine göre nân-ı azîzin nısfı vezninde tâmmü’l-vezn simid ve çörek tabh ve i‘mâl eylemeleri bundan akdem bâ-evâmir-i aliyye tenbîh olunmuş iken tâife-i mezbûre bu esnâda mugāyir-i fermân-ı âlî me’lûf oldukları üzere tabh eyledikleri simidleri ber-vech-i meşrûh noksan tabh ve i‘mâl etmekde oldukları tahkīk olunmağla imdi fîmâ-ba‘d bâlâda beyân olunduğu üzere yağlı simid işlenmeyip nân-ı azîzin nısfı vezninde hâs ve pişkin simid işlemelerini tâife-i merkūmeye muhkem tenbîh ve te’kîde dikkat ve mütenebbih olmayanların icrâ-yı tedîblerine mübâderet olunmak için keyfiyeti i‘lâma mübâderet eyleyesiz deyü. Fî 7 Ca sene 1225