İstanbul Mahkemesi 97 Numaralı Sicil (H.1217-1225 / M. 1802-1810) cilt: 83, sayfa: 549 Hüküm no: 412 Orijinal metin no: [146b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Düşmanla cihat etmek isteyen gönüllülerin, sefere gitmek üzere Davutpaşa Sahrası’nda bulunan İbrahim Paşa’nın emri altındaki askeri birliğe katılmaları İbrahim Paşa ma‘iyyetiyle gazâya azîmete buyruldu. Bâ-sah. İstanbul Kādısı Fazîletlü Efendi Hâlâ Kocaeli sancağına mutasarrıf sa‘âdetlü Hüsrev Paşa hazretlerinin Kethudâları Rumeli Beylerbeyisi pâyesiyle olan Mîrimîrân-ı kirâmdan İbrahim Paşa sefer-i hümâyûna azîmet etmek üzere müstashab-ı ma‘iyyeti olan üç bin altı yüz mikdârı süvâri ve piyâde askeriyle Dersa‘âdet’e vürûd ile Sahrâ-yı Davutpaşa’da müheyyâ olduğundan Paşa-yı mûmâ-ileyh asâkir-i mevcûdesiyle Varna’ya me’mûr kılınarak işbu Perşembe günü hareket edecek olup ancak küffâr-ı hâk-sârın memâlik-i İslâmiyeye hücûm ve ihâneti cihetiyle ber-mûceb-i fetvâ-yı şerîf gazâ ve cihâdın umûma farzıyeti âşikâr olmağın Âsitâne-i aliyyeden fî-sebîlillâh gazâya niyet ve arzusu olanların Paşa-yı mûmâ-ileyh ma‘iyyetiyle azîmetleri muktezâ-yı irâde-i aliyyeden olmağla imdi bi’l-cümle eimme-i mahallâtı nezdinize celb ile mahâll[e]lerinde bu misillü gazâ ve cihâda azîmet niyet-i hâlisasında olanların ma‘iyyet-i Paşa-yı mûmâ-ileyhe azîmetleri muktezâ-yı irâde-i seniyyeden idiğini ifâde ve telkīne dikkat eylemelerini tenbîh ve te’kîde mübâderet eyleyesin deyü. Fî 7 C sene 1225