İstanbul Mahkemesi 97 Numaralı Sicil (H.1217-1225 / M. 1802-1810) cilt: 83, sayfa: 550 Hüküm no: 413 Orijinal metin no: [146b-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Çeşitli cins altın paraların emirde belirtilen fiyatlar üzerinden tedavül etmesi, eksik altının alınıp verilmemesi. Eksik altın alınmamasına buyruldu. Bâ-sah. İstanbul Kādısı Fazîletlü Efendi Cemî‘ zamanda ve ale’l-husûs bu misillü hengâm-ı seferde beyne’n-nâs mütedâvil olan ecnâs-i altının ziyâdeye râyic olmaması ve eksik altın alınıp verilmemesi lâzımeden iken bu esnâda o makūle ecnâs-i altın ziyâdeye verilip alınmakda ve eksik altın dahi ahz ü i‘tâ olunmakda olduğu [147a] âşikâr ve bu husûs cânib-i mîrîye zararı mûcib olduğundan gayri ibâdullâha dahi beher hâl müstevcib-i mazarrât olacağı bedîdâr olmağın ecnâs-i altın ziyâdeye râyic olmamak ve eksik altın bir vechile alınıp verilmemek husûsuna irâde-i seniyye müte‘allik olmağla imdi el-hâletü hâzihî beyne’n-nâs cârî olduğu vechile İstanbul altını altı buçuk guruşa ve nısfiyesi üç guruş on paraya ve Mısır altını beş buçuk guruşa ve nısfiyesi yüz on paraya ve fındık altını dokuz guruşa ve yaldız altını on guruşa ve Macar altını dokuz buçuk guruşa alınıp verilmek ve ziyâdeye râyic olmamak ve eksik altın ahz ü i‘tâ olunmamak husûsunu bi’l-cümle eimme-i mahallâta tenbîh ve ifâdeye mübâderet eyleyesiz deyü. Fî 9 C sene 1225