İstanbul Mahkemesi 97 Numaralı Sicil (H.1217-1225 / M. 1802-1810) cilt: 83, sayfa: 554 Hüküm no: 416 Orijinal metin no: [148a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Rusya üzerine sefere çıkacak Osmanlı ordusu için hazırlanması emrolunan 80 adet Sirem arabası henüz hazırlanmamış ise bir an önce hazırlanması Araba isti‘câli. Akzâ kuzâtü’l-Müslimîn, evlâ vülâti’l-muvahhidîn, ma‘denü’l-fazli ve’l-yakīn, râfi‘u a‘lâmi’ş-şerî‘ati ve’d-dîn, vârisü ulûmü’l-enbiyâi ve’l-mürselîn, el-muhtassu bi-mezîd-i inâyeti’l-Meliki’l-mu‘în mevlânâ İstanbul Kādısı -zîde[t] fezâilühû- ve iftihârü’l-emâcid ve’l-ekârim, câmi‘ü’l-mahâmid ve’l-mekârim, el-muhtassu bi-mezîd-i inâyeti’l-Meliki’d-dâim Dergâh-ı mu‘allâm Yeniçerileri Sekbânbaşısı -dâme mecduhû- ve kıdvetü’l-emâsil ve’l-akrân Koçaşlar Kethudâsı ( ) -zîde kadrühû- tevkī‘-i refî‘-i hümâyûn vâsıl olucak ma‘lûm ola ki Dînimizin düşmanı olan Moskov keferesinin hâl ve hareketi ve her tarafdan memâlik-i mahrûseme hücûm ve ehl-i İslâm hakkında derkâr olan sû-i kasd ve ihâneti cümleye ma‘lûm olan mevâddan olduğuna mebnî gazâ ve cihâd niyet-i hâlisasıyla livâ-i sa‘âdet-i hazret-i Risâlet-penâhî sâyesiyle bi’n-nefs sefer-i nusret-esere teveccüh ve azîmet-i şâhânem mukarrer olup sen ki mevlânâ ve sekbânbaşı-i mûmâ-ileyhimâsız, ma‘iyyet-i şâhânemde tecemmu‘ edecek asâkir-i muvahhidînin ahmâl ü eskālleri nakli için bundan akdem Başmuhâsebe’den ihrâc olunan sûret-i defter mûcebince Âsitâne-i sa‘âdetimden seksen kıt‘a Sirem arabası tertîb olunup ma‘rifetiniz ve Koçaşlar kethudâsı ma‘rifetiyle tedârük ve Davutpaşa Sahrâsı’na irsâl olunmak üzere emr-i şerîfim ısdâr olunmuş idi. El-hâletü-hâzihî bi-meşiyyetillâhi te‘âlâ işbu hulûl edecek Receb-i şerîfin üçüncü günü tûğ-ı zafer-i [pür]-fürûğ-ı hazret-i cihân-dârânem rekz ü nasb olunmak mukarrer ve meczûm olup müddet-i [148b] kalîle zarfında hareket-i hümâyûn-ı şâhânem karâr-gîr olduğuna binâen zikrolunan arabalar şimdiye kadar tedârük olunmamış ise bundan böyle te’hîri tecvîz olunmayarak bir sâ‘at evvel metîn ve müstahkem olarak tedârük ve tanzîm ve bir gün akdem Sahrâ-yı mezkûra ihrâcı husûsuna mezîd sa‘y ü gayret eylemeniz fermânım olmağın te’kîd ve isti‘câli hâvî işbu emr-i celîlü’l-kadrim ısdâr ve ( ) ile irsâl olunmuşdur. İmdi vusûlünde bâlâda tahrîr ve sûret-i defterde tastîr olunduğu üzere Âsitâne-i sa‘âdetimden müretteb ol mikdâr arabalar şimdiye kadar tedârük olunmamış ise bundan böyle te’hîri tecvîz olmayarak bir sâ‘at evvel metîn ve müstahkem olarak tedârük ve tanzîm ve Sahrâ-yı merkūma tesyîri husûsuna kemâl-i sa‘y ü gayret ve hilâf-ı emrim imrâr-ı vakitden tehâşî ve mücânebet eyleyesiz ve sen ki Kethudâ-yı merkūmsun, sen dahi mûceb-i emr-i şerîfimle amel ve hareket eylemen bâbında fermân-ı âlî-şânım sâdır olmuşdur. Buyurdum ki: Hükm-i şerîfimle ( ) vardıkda bu bâbda vech-i meşrûh üzere şeref-yâfte-i sudûr olan işbu emr-i şerîf-i celîlü’ş-şânımın mazmûn-ı münîfi birle âmil olasız. Şöyle bilesiz alâmet-i şerîfe i‘timâd kılasız. Fî 29 Cumâdelâhire sene 1225 Kostantıniyyeti’l-mahrûse