İstanbul Mahkemesi 97 Numaralı Sicil (H.1217-1225 / M. 1802-1810) cilt: 83, sayfa: 555 Hüküm no: 418 Orijinal metin no: [148b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Savaşa gidecek Müslüman gazilerin ihtiyaçları olan her türlü eşya, malzeme, binek vs.nin yüzde ondan daha yüksek kârla satılmaması hususunda bütün esnafa tembihte bulunulması Onu on bire eşyâ bey‘ olunmak için buyruldu. Bâ-sah. İstanbul Kādısı Fazîletlü Efendi El-hâletü-hâzihî küffâr-ı hâk-sârın memâlik-i İslâmiyete taraf taraf kemâl-i tehâcüm ve tecâvüzü cümleye ma‘lûm olan keyfiyâtdan ve bi’n-nefs hareket-i hümâyûn mukarrer olup geçen gün Sultân Mehmed Han -tâbe serâhu- Câmi‘-i şerîfinde dahi cümle ittifâkı ile bi’z-zât hareket-i hümâyûn-ı Pâdişâhî tasvîb birle karâr verilerek müsta‘înen billâhi te‘âlâ hemân mevkib-i hümâyûnun hareket ve azîmet edeceği bedîhiyâtdan olmağın emr-i cihâda me’mûr olan guzât-ı muvahhidînin muhtâc oldukları levâzım-ı seferiyelerini tanzîmde hasâr u zarardan vikāye kılınmaları ehemm-i umûr ve bey‘ u şirâ ile me’lûf olan esnâfdan cümlesi değil ise de ba‘zıları böyle fırsat ittihâzıyla levâzım-ı seferiye ve edevât-ı harbiyeye müte‘allik silâh ve sâir eşyâyı gālî bahâya füruht ile mücâhidîni ziyâde ızrâr edecekleri mülâhazadan gayr-ı ba‘îd olup bu makūle gālî bahâ ile eşyâ füruhtundan tehâşî ederek onu on bire füruht ile kanâ‘at eylemeleri levâzım-ı diyânetden idiği vâreste-i kayd-ı sutûr olmağla imdi sefer[e] gidecek guzât-ı muvahhidînin alacakları hayvanât ve silâh u bisât ve sâir levâzım-ı seferiyeden olan eşyâ onu on bir hesâbıyla füruht olunup gālî bahâdan tehâşî ve mücânebet eylemelerini Atpazarı Canbazları Kethudâsı’na ve ahâlî-i Bedesten’e ve Sipâh Pazarı ve Bitpazarı ve abacı ve çukacı ve silâh ve mûytâb ve çadırcı ve sâir esnâf kethudâlarının cümlesine tenbîh ve te’kîde mübâderet ve mütenebbih olmayıp ziyâde bahâya eşyâ füruht eden olur ise lede’t-tahkīk bilâ-emân tertîb-i cezâ kılınacağını gereği gibi gûş-ı hûşlarına ifâde ve tefhîme dikkat eyleyesiz deyü. Fî 26 C sene 1225