İstanbul Mahkemesi 97 Numaralı Sicil (H.1217-1225 / M. 1802-1810) cilt: 83, sayfa: 556 Hüküm no: 419 Orijinal metin no: [148b-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Bebek köyü ahalisinin et sıkıntısı çekmemesi için köydeki kasap dükkânının mezbaha yapıldığı ve bu dükkânın 1/8 hayvan hissesinin Rumelihisarı Mezbahası’ndan ifraz olunduğu Bebek’e selhhâne vaz‘ olunmağla ilmühaber [metinde “amelühaber”]. İstanbul Kādısı Fazîletlü Efendi Hazretleri Tarafına Mahrûse-i Galata’ya muzâfe kasaba-i Beşiktaş’a tâbi‘ Hümâyunabad nâm-ı diğer Bebek karyesinde vâki‘ bir bâb kasab dükkânı bir sümün hisse ile Rumelihisarı’ndaki Selhâne’ye merbût olduğu mukayyed olmağla hisse-i mezkûru mahâll-i tevzî‘inden alıp Selhâne-i mezkûrede zebh ve karye-i mezkûre dükkânında ibâdullâha füruht eylediği şurût-ı nizâmından iken karye-i mezkûre ahâlîleri vakt ü zamanıyla lahm alamadıklarından kemâl-i zarûret ve muzâyakaya dûçâr olduklarından bi’z-zarûr karyelerinde bir bâb kasab dükkânının bir sümün hissesi Rumelihisarı Selhânesi’nden ifrâz ve karye-i mezkûrede müceddeden selhhâne vaz‘ olunup hisseleri olan ağnamı selhhâne-i mezkûrede zebh ve ibâdullâha füruht eylemek üzere karye-i mezkûre vücûhundan mazbûtü’l-esâmî kimesneler tazallüm-i hâl ve istid‘â-yı inâyet eylediklerini hâlâ mahrûse-i Galata Kādısı fazîletlü Efendi hazretleri memhûr i‘lâmıyla inhâ etmekle şurût-ı nizâmı ba‘de’l-ihrâc iktizâsı hâlâ Ser-kassâbân-ı hâssa izzetlü es-Seyyid Ahmed Ağa’dan isti‘lâm olundukda karye-i mezkûrede vâki‘ kasab dükkânı derûnunda selhhâne vaz‘ olunup bir sümün hissesini mahâll-i tevzî‘inden alıp selhhâne-i mezkûrede zebh ve ibâdullâha füruht eylediği sûretinde vaktiyle mal-ı celeb zâyi‘ olduğu hâlde tamamen te’diye olunmak şurût-ı nizâmından olmağla ancak karye-i mezkûrede vâki‘ dükkân derûnunda selhhânenin bir sümün hissesi Hisar’dan ifrâz ve Seyyid Emrullah nâm kimesne uhdesine kayd ve mahâll-i tevzî‘de bir sümün hissesini alıp vakt ü zamanıyla celebâna edâ ve mal-ı celebin akçesine kesr u noksan zuhûr eder ise karye-i mezkûre ahâlîlerinden İmâm Abdülhalim Efendi ve Müezzin Ali Efendi, Bebek Ustası Mustafa Ağa, Himmetzâde Seyyid Muhyiddin Efendi, Kahveci Halil Ağa, Balıkcıbaşı Ahmed Ağa, Sarrâc Mehmed Ağa, Otuzbir [149a] Seyyid Mehmed Ağa, Es‘ad Efendi, Çiçekzâde Osman Ağa, Hammâmî Osman Ağa, Simkeşzâde Seyyid İsmail, Seyyid Yusuf Ağa, Ebezâde Mustafa Molla Efendi, Abdülhalimzâde Ali Rıza Efendi, Bekci Mustafa, Reiszâde Salih Ağa, Arab Ali Beşe, Kasımzâde Seyyid Ali Beşe, Ustazâde İbrahim Beşe, Osman Efendi, Nakkāş Salih Ağa, Emir Hüseyinoğlu Mehmed Ağa, Kādı Ahmed Efendi, Kādı Seyyid Ahmed Efendi, Şeyhülislâm Efendi’nin Hacı Reis Efendi, Kantarcı İsmail Ağa, Ömer Efendi, Kādı Hacı Abdurrahman Efendi, es-Seyyid Ömer Efendi, Kalafatcı Ahmed Ağa nâmûn kimesneler edâsına müte‘ahhid olmağla mûcebince Başmuhâsebe’ye ve İstanbul Kādısı sicillâtına kaydolunup tarafeyne birer kıt‘a sûret i‘tâsı iktizâ eylediği mûmâ-ileyh memhûren i‘lâm etmekle mûcebince Başmuhâsebe’ye ve İstanbul Kādısı fazîletlü Efendi sicillâtına kayd ile tarafeyne başka başka sûretleri i‘tâ olunmak bâbında fermân-ı âlî sâdır olmağın mûcebince Başmuhâsebe’ye kaydolunup tarafeyne başka başka sûretleri verilmekle selhhâne-i mezbûr Rumelihisarı’ndan ifrâz olunduğunu müş‘ir İstanbul Kādısı fazîletlü Efendi hazretleri taraflarına dahi işbu ilmühaber verildi. Fî 6 Recebi’l-ferd sene 1225