İstanbul Mahkemesi 97 Numaralı Sicil (H.1217-1225 / M. 1802-1810) cilt: 83, sayfa: 564 Hüküm no: 426 Orijinal metin no: [150b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mektep hocalarının haftada 2 gün öğle vaktinde çocukları yanlarına alıp münasip camilere giderek dua etmeleri Du‘â için buyruldu. Bâ-sah. İstanbul Kādısı Fazîletlü Efendi Adû-yı dîn ü devlet ve mühîn-i mülk ü millet olan Moskov keferesinin her tarafdan memâlik-i İslâmiyeye tahattî ve tecâvüzüyle asâkir-i İslâm mukātele ve muhârebe üzere olduklarından mansûriyet-i [metinde “mansûrîn-i”] a‘lâm-ı İslâm ve makhûriyet-i [metinde “makhûriyet-i”] a‘dâ-i liâm ed‘iyesi cümle ümmet-i Muhammed’e farz-ı ayn olmağın cevâmi‘ ve mesâcidde evkāt-ı hamsede du‘â olunmakda ise de bundan böyle dahi terk olunmayıp Dersa‘âdet’de vâki‘ mekteb hocaları dahi haftada iki gün vakt-i zuhrda [metinde “zuhûr”] gürûh-ı sıbyânı ma‘iyyetlerine istishâb birle münâsib câmi‘lere azîmet ve ed‘iye-i hayriyeye muvâzabet eylemeleri husûsuna irâde-i seniyye müte‘allik olmağla imdi bundan böyle dahi evkāt-ı hamsede akīb-i salavât-ı mefrûzada cümle ümmet-i mü’minîn câniblerinden kāimen ed‘iye terk olunmamasını cevâmi‘ ve mesâcid eimme ve huddâmına tenbîhe dikkat ve mekteb hocaları dahi gürûh-ı sıbyânı yevm-i mezkûrlarda ma‘iyyetlerine alıp mescid ve münâsib olan câmi‘lere azîmet birle asâkir-i İslâmın mansûriyetini ve küffâr-ı hâk-sârın makhûriyetini mahrûse-i Dergâh-ı Kādı’l-hâcât’dan niyâz ve du‘â ve münâcât eylemelerini iktizâ edenlere tavsiye ve te’kîde mübâderet eyleyesin deyü. Fî 22 Şa‘bân sene 1225