İstanbul Mahkemesi 97 Numaralı Sicil (H.1217-1225 / M. 1802-1810) cilt: 83, sayfa: 563 Hüküm no: 425 Orijinal metin no: [150a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Padişah, Valide Sultan ve haremi için hazırlanması emrolunan 69 çift talimli beygir ve arabacılarının tedarik edilip Mirahur-ı Sânî’ye teslim edildiği Arabacıların ilmühaberi. Mevkib-i hümâyûn-ı şâhâne ve Mehd-i ulyâ-yı saltanat ve harem-i hümâyûn lâzımeleri için Dersa‘âdet’de vâki‘ koçı arabacılarından matlûb olunan seksen kıt‘a Sirem arabalarının tedârükünde usret derkâr olduğuna mebnî zikrolunan arabalara bedel olarak altmış dokuz çift mu‘allem araba bargirleriyle lâzım gelen arabacıların tedârük ve i‘tâya koçaş [metinde “koçac”] esnâfı kethudâsı ve sâir ustaları müte‘ahhid olmuşlar ise de mevkib-i hümâyûn-ı Pâdişâhînin bi-mennihî te‘âlâ nehdat ve hareketi be-gāyet takarrub etmekden nâşî matlûb olan mezkûru’l-mikdâr mu‘allem ve tüvânâ araba bargirleriyle lâzım gelen arabacıların ber-mûceb-i ta‘ahhüd bir sâ‘at akdem tedârük ve tanzîm birle i‘tâsı husûsuna mübâderet olması lâzımeden olmağla imdi esnâf-ı merkūm kethudâlarını celb ile müte‘ahhid oldukları vechile mezkûru’l-mikdâr mu‘allem ve tüvânâ araba bargirleri ve arabacılarının tedârük ve tehiyye ve hazır u âmâde birle Hâssa Arabacıları Kışlası nâzırı Mirâhur-ı Sânî-i hazret-i şehriyârî Süleyman Bey tarafına teslîm eylemelerini esnâf-ı merkūma muhkem tenbîh [metinde “ben”] ve te’kîd olarak tekrar sûret-i ta‘ahhüdlerini i‘lâma mübâderet olmak bâbında beyâz üzerine sâdır olan fermân-ı âlî-şâna imtisâlen Esnâf-ı merkūmun Kethudâsı İbrahim Ağa ve Yiğitbaşısı Ahmed Usta ve ihtiyâr söz sahibleri Atpazarlı Ârif Usta ve Macunculu Abdullah Usta ve Aksaraylı Reşid Usta ve Karagümrüklü Said Usta ve Elçihanlı Topcuoğlu Mustafa Usta ve Hüseyin Usta ve Bahçekapılı Süleyman Usta ve sâirleri meclis-i şer‘a ihzâr olunup nâzır-ı mûmâ-ileyh tarafından kabza me’mûr Hâssa Arabacı Bölükbaşısı el-Hâc Ahmed hazır olduğu hâlde fermân-ı âlî-i mezkûr muvâcehelerinde kırâet ve mazmûnu tefhîm olundukda mezkûru’l-mikdâr altmış dokuz çift mu‘allem araba bargirleriyle lâzım gelen arabacıları fenninde mâhir olarak ber-mûceb-i emr-i âlî nâzır-ı mûmâ-ileyh tarafına bî-kusûr tamamen mezkûru’l-mikdâr çift mu‘allem bâ[r]gîrânı teslîme her biri tâyi‘an ta‘ahhüd eylediklerini fazîletlü, semâhatlü İstanbul Kādısı Ahmed Ârif [150b] Efendi hazretleri memhûren i‘lâm etmeleriyle mevkib-i hümâyûn-ı hareket-makrûn [için] Âsitâne-i sa‘âdetde vâki‘ koç[i]ci esnâfından tertîb olunan seksen kıt‘a Sirem arabalarına bedel olarak müte‘ahhid oldukları altmış dokuz çift mu‘allem bargirlerin sürücüleriyle ma‘an Mirâhur-ı sânî-i hazret-i şehriyârî tarafına edâ ve teslîm olmuş olmağla i‘lâm-ı mezkûr Başmuhâsebe’ye kaydolunup sûret ve ilmühaber verilmek bâbında sâdır olan fermân-ı âlî mûcebince sûret ve ilmühaberleri verilmek fermân buyurulmağın mûcebince kaydolunup altmış dokuz çift bargirânı sürücüleriyle ma‘an Mirâhur-ı Sânî Ağa tarafına teslîm olmuş olup nâzır-ı mûmâ-ileyh tarafına ilmühaberi verilmekle fazîletlü İstanbul Kādısı efendi hazretleri tarafına dahi işbu ilmühaber verildi. Fî 8 Şa‘bân sene 1225