İstanbul Mahkemesi 97 Numaralı Sicil (H.1217-1225 / M. 1802-1810) cilt: 83, sayfa: 565 Hüküm no: 428 Orijinal metin no: [150b-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Peynir ve balın narhtan daha yüksek fiyatla satılmaması Narhdan ziyâde peynir bey‘i men‘i. Bâ-sah. İstanbul Kādısı Fazîletlü Efendi Bi-hamdihî te‘âlâ bir tarafdan asel ve peynir gelmekde olduğundan narh-ı cârîsi üzere ibâdullâha füruhtu lâzımeden iken tüccâr ve muhtekir tâifesi narh-ı cârîye adem-i kanâ‘at birle iki katına füruhta ictisâr ve ibâdullâhı ızrâra ibtidâr eyledikleri tahkīk olmağla imdi işbu emr-i âlî tarafınıza vürûdunda tüccâr-ı merkūmeyi huzûrunuza celb ve ihzâr birle bundan böyle narh-ı cârîsinden ziyâdeye her kim füruht eder ise ahz ve bilâ-emân tertîb-i cezâları husûsunda dakīka-i vâhide fevt olunmayacağını gûş-ı hûşlarına ilkā [metinde “îkā”] ederek peyder pey vürûd eden asel ve peyniri ketm ü ihtifâ etmeye[re]k narh-ı cârî üzere ibâdullâha füruht eylemelerini ta‘ahhüd ettirterek siz dahi dâimâ nezâret ve dikkat eyleyesin deyü. Fî 2 Ramazan sene 1225