İstanbul Mahkemesi 97 Numaralı Sicil (H.1217-1225 / M. 1802-1810) cilt: 83, sayfa: 566 Hüküm no: 429 Orijinal metin no: [150b-4] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Vefat eden kazasker, kadı ve müderrisler için âdet gereği Fatih Camisi’nde sela okutulmak istendiğinde müezzinlerin 3 kuruştan daha fazla ücret talep etmemesi Salâ için üçer guruşdan ziyâde ücret taleb etmemeğe müezzinlere tenbîh emri. Bâ-sah. İstanbul Kādısı Fazîletlü Efendi Öteden beri sudûr-ı kirâm ve mevâlî-i fihâm ve müderrisîn-i zevi’l-ihtirâmdan hulûl-i ecel-i mev‘ûdlarıyla irtihâl-i dâr-ı bekā edenlerin i‘lân-ı vefâtları zımnında Sultân Mehmed Han Câmi‘-i şerîfinde salâ kırâet olunması âdet-i hasene-i Devlet-i aliyye ve kā‘ide-i müstahsene-i saltanat-ı seniyyeden iken bir müddetden beri o makūle vefât eden zâtlar için Câmi‘-i şerîf-i mezkûrun müezzinleri salâ vermeğe onar on beşer guruş mutâlebe ile verese-i müteveffâyı ızrâr ve tazyîk eylediklerinden bu keyfiyet âdet-i kadîmenin refte refte terkine bâ‘is oldukları tarafımıza inhâ olunup ancak de’b-i dîrîn-i Devlet-i aliyyeden olan bu makūle nizâm ve kā‘idenin terki nâ-münâsib olmağla imdi Câmi‘-i şerîf-i mezkûrun müezzinbaşısını ve sâir müezzinlerini huzûrunuza celb ile fîmâ-ba‘d o makūle vefât eden zevât-ı kirâm hakkında verilecek salâ için müezzinân üçer guruşdan ziyâde ücret taleb eylememelerini ber-vech-i te’kîd tenbîhe dikkat ve bundan sonra mütenebbih olmayıp üçer guruşdan ziyâde akçe matlûb ederler ise lede’t-tahkīk icrâ-yı tedîblerine ibtidâr olunacağını dahi gûş-ı hûşlarına ilkāya mübâderet eyleyesiz deyü. Fî 6 Za sene 1225