İstanbul Mahkemesi 137 Numaralı Sicil (H.1236-1238 / M 1821-1822) cilt: 86, sayfa: 64 Hüküm no: 16 Orijinal metin no: [3b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Hüseyin Ağa b. Veys’in, yağcı dükkânı gediğini Karakaş Hasan Ağa b. Abdülhamid’e sattığı Galata’da yağcı gediği mübâya‘ası i‘lâmı Ma‘rûz[-ı dâ‘î-i devlet-i aliyyeleridir ki] Mahrûse-i Galata yağkapanı tüccârından Tophâneli Hüseyin Ağa b. Veys b. Abdullah husûs-ı âtîde vekîli olduğu es-Seyyid Zekeriya Ağa b. es-Seyyid el-Hâc Ahmed ve Molla Hasan b. Ahmed şehâdetleriyle sâbit olan es-Seyyid el-Hâc Ahmed Ağa b. Halil meclis-i şer‘-i münîrde bâ‘isü’l-aklâm Karakaş Hasan Ağa b. Abdülhamid mahzarında bi’l-vekâle takrîr-i kelâm edüp akd-i âti’z-zikrin sudûruna değin müvekkil-i mezbûrun başmuhâsebe kaleminde mukayyed bâ-sûret yedinde mâlı ve mülkü olan mahrûse-i mezbûrede kapan-ı merkūmda vâki‘ bir tarafdan Âişe Hatun dükkânı ve bir tarafdan Çarhacıoğlu dükkânı ve bir tarafdan leb-i deryâ ve bir tarafdan tarîk-i âm ile mahdûd bir bâb yağcı dükkânı derûnunda mevcûde beyne’l-esnâf gedik tâ‘bir olunur âlât-ı lâzıme-i ma‘lûmeyi ben bi’l-vekâle tarafeynden bi’l-îcâb ve’l-kabûl bâtten ve sahîhan bi-safkatin vâhidetin mezbûr Karakaş Hasan Ağa’ya üç bin guruş semen-i medfû‘ ve makbûza bi’l-vekâle bey‘ ve temlîk ve teslîm eylediğimde ol dahi ber vech-i muharrer iştirâ ve temellük ve tesellüm ve kabûl edüp mebî‘-i mezkûrun tağrîr ve gabnine müte‘allika âmme-i da‘vâdan ben bi’l-vekâle mezbûr Karakaş Hasan Ağa’nın ibrâ-i âm ile kabûlü hâvî ibrâ ve iskāt eyledim fîmâ ba‘d âlât-ı gedik-i merkūmda müvekkilim mezbûrun aslâ ve kat‘â alâka ve medhali kalmayup mezbûr Karakaş Hasan Ağa’nın mâl-ı müşterâsı olmuşdur deyü ba‘de’l-ikrâr ve’t-tasdîk ânifen iştirâ olunan âlât-ı gedik-i merkūmun mahâll-i evveli kaydı ref‘ ve terkīn ve müşteri-i mezbûr Karakaş Hasan Ağa ismine tasrîhan kayd birle şürût-ı nizâmlarına tatbîkan kaleminden yedine bir kıt‘a sûret i‘tâsı iktizâ eylediği İstanbul Mahkemesi’nden huzûr [-ı âlîlerine i‘lâm olundu.] Fî 22 L sene 1236