İstanbul Mahkemesi 137 Numaralı Sicil (H.1236-1238 / M 1821-1822) cilt: 86, sayfa: 63 Hüküm no: 15 Orijinal metin no: [3a-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. İpek tüccârından Tokatlı Hacı Osman Ağa’nın ipekçi esnaflığından çıkarıldığı İpekçi tüccârından Tokatlı el-Hâc Osman Ağa’nın sû-i hâl i‘lâmı Ma‘rûz[-ı dâ‘î-i devlet-i aliyyeleridir ki] Âsitâne-i aliyyede vâki‘ sandal bezzâzistânı kethüdâsı es-Seyyid Osman Ağa ve sandalcılar kethüdâsı es-Seyyid Hâfız Mehmed Emin Ağa ve Yiğitbaşı Ebûbekir Ağa ve Bölükbaşı es-Seyyid Mehmed Sâdık Ağa ve esnâfından es-Seyyid Halil Ağa ve es-Seyyid Ahmed Ağa ve Hâfız Mustafa Efendi ile ipek tüccârından Hâfız Mehmed Emin Efendi ve Abdulkādir Ağa ve Hâfız Abdullah ve el-Hâc Halil Ağa ve Ali Bey ve Mehmed Râşid Ağa ve Hâfız Hüseyin Efendi ve es-Seyyid İsmail Efendi ve el-Hâc Ali Ağa ve Çalık Mehmed Ağa ve Kemhacı esnâfından Ali Alemdâr ve el-Hâc Süleyman Ağa ve Yiğitbaşı Ahmed Alemdâr ve sâir mazbûtü’l-esâmî kimesneler meclis-i şer‘-i enverde ipek tüccârından Tokâdî es-Seyyid el-Hâc Osman Ağa b. Es-Seyyid Mehmed Emin muvâcehesinde merkūm Tokâdî es-Seyyid el-Hâc Osman Ağa beş seneden berü bezzâzistân-ı merkūmda bir bâb dükkân ve Der-aliyye’de yağcı hanında bir bâb oda istîcâr ve derûnlarında ticâret vechile sâkin olup lâkin esnâfımız kethüdâ ve ihtiyârlarına itâ‘at ve inkıyâd etmediğinden mâ‘adâ ahz u i‘tâsında istikāmeti olmayup her bâr bize ve sair ibâdullâha bey‘ ve teslîm eylediği ipeği noksan vezn etmek ve ibâdullâha nisbeten verdiği [3b] ipek semeninden aldığı akçenin mikdârını defterine noksan kayd edüp ba‘dehû ziyâde taleb ve ahz ile ibâdullâhı ızrâr ve âhar vechile dahi cevr ve ezâ ve hîle ve hud‘a âdet-i müstemirresi olduğundan bundan akdem bi’d-defa‘ât kendüye tenbîh ve nush ve pend eylediğimizde kat‘a kabûl etmeyüp ef‘âl-i nâ-marziyyesine musır olup ve bu esnâda mâlik olduğu Hurşid nâm kebîr gulâmını ehl-i ırz gürûhundan hâzır bi’l-meclis sandalcı kethüdâ vekîli es-Seyyid Mehmed Ağa ile nizâ‘ içün gönderip gulâm-ı mezbûr hâzır-ı merkūm üzerine esnâf ihtiyârları huzûrlarında silâh çekip bu vechile kendisinden ve gulâmından kat‘a emniyetimiz yokdur deyü her biri bi’l-muvâcehe teşekkî ve ticâret-i mezkûrdan keff-i yed-birle zikr olunan dükkân ve odadan ihrâc olunması bâbında emr-i âlîleri sudûru niyâzında olduklarında merkūm Tokâdî es-Seyyid el-Hâc Osman Ağa dahi rızâsıyla ticâret-i mezbûreden keff-i yed ve kâr-ı âhara sülûk-birle sâlifü’l-beyân dükkân ve odayı bi’l-külliye terk ve mutasarrıflarına teslîm ve gulâm-ı mezbûru âhara bey‘e ve fîmâ ba‘d bir kimesneyi rencîde etmeyüp kesb-i âharıyla me’lûf ve ırzıyla mukayyed olmak üzere ta‘ahhüd edüp esnâf-ı merkūmeyi bu vechile irzâ ve iskāt eylediği dergâh-i mua[llâ] Yeniçerileri ağası sa‘âdetlü ağa kıbelinden mübâşir ta‘yîn buyrulan Mumcu Yusuf Ağa iltimâsıyla İstanbul Mahkemesi’nden huzûr-ı âlîlerine i‘lâm olundu. Fî 14 L sene 1236