İstanbul Mahkemesi 137 Numaralı Sicil (H.1236-1238 / M 1821-1822) cilt: 86, sayfa: 68 Hüküm no: 21 Orijinal metin no: [5a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Hadice Hanım bt. Mehmed’in alacak davasında kardeşi İsmail Ağa ile sulh olduğu Helvacı gedikleri kirâsı tanzîmi Ma‘rûz[-ı dâ‘î-i devlet-i aliyyeleridir ki] Sâhibe-i arzuhâl zâtı mu‘arrefe Hadice Hanım bt. Mehmed Ağa meclis-i şer‘-i münîrde li-ebeveyn karındaşı derûn-ı arzuhâlde mezkûrü’l-ism İsmail Ağa muvâcehesinde İstanbul’da Aksaray’da sebîl kurbünde vâki‘ bir bâb ve mahrûse-i Galata’da Câmi‘-i kebîr Mahallesi’nde kâin bir bâb ki cem‘an iki bâb helvacı dükkânları derûnlarında mevcûde gedik âlât-ı lâzımelerinin on ikişer sehm i‘tibâriyle sülüs hisseleri benim ve sülüsân hisseleri karındaşım merkūmun ve Fındıklı’da kolluk karşısında vâki‘ bir bâb helvacı derûnunda mevcûde gedik âlâtının kezâlik on iki sehm i‘tibâriyle üç sehm üç pul hissesi karındaşım merkūmun şirâen ve mâ‘adâsı bi’l-irsi’ş-şer‘î islâsen yedimizde iştirâken mâlımız olmağla karındaşım mezbûr İsmail Ağa işbu târih-i i‘lâm senesinde duhûl eden rûz-ı hızır ibtidâsından sene-i âtiye rûz-ı hızırı ibtidâsına değin isti‘mâl etmek üzere Aksaray’da olan dükkân-ı mezkûr gediğini bin yüz guruş kirâ kavliyle Ahmed Usta’ya ve Galata’da olan dükkân-ı merkūm gediğini altı yüz guruş kirâ kavliyle diğer Ahmed Usta’ya ve Fındıklı’da olan dükkân-ı mezbûr gediğini altı yüz elli guruş kirâ kavliyle Mehmed Usta’ya bi’l-cümle helvacı esnâfı kethüdâ ve ustaları ma‘rifetleriyle ve benim izin ve tevkîlimle îcâr ve teslîm ve kirâları olan cem‘an iki bin üç yüz elli guruşu dahi asâleten ve vekâleten ahz ü kabz edüp lâkin kirâ-yı mezkûrlardan benim hissem olmak üzere karındaşım mezbûrdan matlûbum olan yedi yüz bir guruşu bana vermeyüp iznimsiz umûruna sarfla istihlâk eylediğinden ben ve karındaşım merkūmun müstecirûn-ı mezbûrûn ile olan akd-i mezkûrunu fesh ve âlât-ı gedik-i mezkûrlarda olan hisselerimi muhâyâten zabıt dâ‘iyesinde olmuşdum el-hâletü hâzihî karındaşım merkūm İsmail Ağa meblağ-ı mezkûr yedi yüz bir guruşu işbu târih-i i‘lâmdan bir hafta mürûrunda bana edâya ben dahi müddet-i icârede gerek müstecirûn-ı merkūmun ve gerek karındaşım merkūma bir vechile müdâhale etmemek üzere ta‘ahhüd ve bu vechile bi’t-terâzî kat‘-ı nizâ‘ eyledik dediğini merkūm İsmail Ağa tasdîk eylediği İstanbul Mahkemesi’nden huzûr-ı âlîlerine i‘lâm olundu. Fî 3 Za sene 1236