İstanbul Mahkemesi 137 Numaralı Sicil (H.1236-1238 / M 1821-1822) cilt: 86, sayfa: 69 Hüküm no: 22 Orijinal metin no: [5a-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Kadıköylü Mustafa Ağa’nın, Kirkor v. Karabet’e olan borcunu ödemesi gerektiği Sarrafın Kadıköylü Mustafa Ağa üzerine sened, hüküm 1.150 guruş Ma‘rûz[-ı dâ‘î-i devlet-i aliyyeleridir ki] İstanbul’da Vâlidehanı sarraflarından arzuhâl eden Kirkor v. Karabet zimmî meclis-i şer‘de arzuhâlde mezkûrü’l-ism Kadıköylü Mustafa Ağa b. el-Hâc Mustafa mahzarında merkūm Mustafa Ağa zimmetlerinde bin iki yüz otuz üç senesi Muharreminin yirmi birinci günü ile müverrah bir kıt‘a deyn temessükü mantûkunca karzdan iki bin üç yüz seksen guruş ve sene-i merkūme Rebî‘ülâhiri’nin on beşinci günü ile müverrah ve diğer bir kıt‘a temessük mantûkunca karzdan yüz yirmi beş guruş ve def‘a bâ-temessük yedimden karz aldığı yirmi beş guruş ve bilâ-devr-i şer‘î nemâ olarak matlûbum olan iki bin guruş ki cem‘an ikrârı mûcebince dört bin beş yüz otuz guruş matlûbumdur bilâ-devr-i şer‘î nemâ olduğunu mu‘terif olduğum iki bin guruş şâyân-ı iltifâta olmamağla şer‘an tenzîl olunup bâkīsi olan iki bin beş yüz otuz guruş merkūmun zimmetinde hâlâ hakkım olmağla meblağ-ı mezbûr iki bin beş yüz otuz guruşu merkūm Mustafa Ağa’dan taleb ederim deyü da‘vâ ettikte ol dahi cevâbında taraf-ı mersûma bâlâda mezkûr temessük mûcebince bin guruşu ve ba‘dehû iki def‘ada yüz elli guruş ki cem‘an bin yüz elli guruş karzdan zimmetinde sahîhan deyni olduğunu ve okumak bildiğimden zimmî-i mersûmun âhara yazdırdığı temessük-ı mezkûru bin guruşa olmak üzere temhîr eylediğini i‘tirâf müdde‘î-i mersûmun ziyâde bin iki yüz seksen guruş karz müdde‘âsını ba‘de’l-inkâr müdde‘î-i mesfûr ber-minvâl-i muharrer ziyâde müdde‘âma şâhidlerim diyâr-ı âhar-ı ba‘îddedir geldikleri zamân ikāme ederim deyü müdde‘âsını beyâna kādir olmayup tâlib-i tahlîf dahi olmamağın mûcebiyle müdde‘î-i mersûm Kirkor zimmî ziyâde bin iki yüz seksen guruş müdde‘âsıyla merkūm Mustafa Ağa’ya bilâ-beyyine mu‘ârazadan ba‘de’l-men‘ alâ-mûcebi ikrârihi meblağ-ı mezkûr bin yüz elli guruşun müdde‘î-i mersûma edâsıyla merkūm Mustafa Ağa ilzâm olunduğu İstanbul Mahkemesi’nden huzûr-ı âlîlerine i‘lâm olundu. El-emru li-veliyyü’l-emr. Fi’l-yevmi’r-râbi‘ ve’l-ışrîn min-Şevvâli’l-mükerrem li-sene sitte ve selâsin ve mi’eteyn ve elf