İstanbul Mahkemesi 137 Numaralı Sicil (H.1236-1238 / M 1821-1822) cilt: 86, sayfa: 75 Hüküm no: 29 Orijinal metin no: [7a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Hacı Süleyman ve vâlidesi Şerîfe Hadice Hatun’un evlerine izinsiz yaptırdıkları tahta-pûş ve bacayı kaldırmayı taahhüt ettikleri Husûsla tahta-pûş nizâ‘ı Ma‘rûz[-ı dâ‘i-i devlet-i aliyyeleridir ki] Sâdır olan fermân-ı âlîlerine imtisâlen husûs-ı âti’l-beyânı mahallinde ketb ve tahrîr ve istimâ‘ içün savb-ı şer‘-i enverde[n] irsâl olunan Başkâtib İbrahim Ârif Efendi dâ‘îleri hâssa mimarı hulefâsından Derviş Ahmed ve Sofi Mustafa halîfeleriyle nezâret-i dâ‘îlerinde âsûde evkāfdan merhûm Kor Çelebi nâm sâhibü’l-hayrın İstanbul’da Mahmud Paşa kurbünde Hacı Küçük Mahallesi imâmlarına galle ve tevliyeti meşrûta vakıf müsakkafâtından mahalle-i mezbûrede Çukacı sokağında vâki‘ ma‘lûmü’l-hudûd ve şehriye on akçe icâre-i müeccele ile Peştahtacı es-Seyyid el-Hâc Süleyman Ağa b. Hasan ile vâlidesi Şerîfe Hadice bt. Yusuf nâm Hatun’un bi’l-münâsafa bâ-temessük-ı mütevellî taht-ı tasarruflarında olan bir bâb menzile varup huzûr-ı Müslimînde ba‘de akdi’l-meclis vakf-ı mezkûrun bi’l-meşrûta mütevellîsi ve menzil-i merkūm verâsında kâin vakf-ı mezbûr müsakkafâtından bir bâb menzilin mutasarrıfı mahalle-i mezbûre imâmı sâhib-i arzuhâl Hâfız Ali Efendi b. Hasan ve menzil-i mezkûr karşısında kâin vakf-ı âhardan bir bâb menzilin mutasarrıfı Mehmed Efendi b. İbrahim nâm kimesneler meclis-i ma‘kūd-ı mezkûrda derûn-ı arzuhâlde mastûrü’l-ism mezbûr es-Seyyid el-Hâc Süleyman Ağa ile vâlidesi zâtı mu‘arrefe merkūme Şerîfe Hadice Hatun muvâcehelerinde mahalle-i mezbûre ahâlîsinden Hâfız Mehmed Efendi b. el-Hâc Mustafa ve Hancı Ali Efendi b. İsmail ve Süleyman Efendi b. Ömer ve Mehmed Nuri Efendi b. Mehmed ve Mustafa Ağa b. Yahya ve Çubukçu Ahmed Ağa b. Mehmed ve Çubukçu Abdullah Ağa b. Hüseyin ve Kebabcı Emin Ağa b. Ahmed nâm kimesneler hâzır oldukları hâlde mezbûrân es-Seyyid el-Hâc Süleyman Ağa ve vâlidesi Şerîfe Hadice Hatun bi’l-meşrûta mütevellîsi olduğum vakf-ı mezbûr müsakkafâtından bi’l-iştirâk mutasarrıflar oldukları üç direk bir bâb menzillerinin damı üzerine benim iznim yok iken müceddeden binâ ve ihdâs eyledikleri mimârân-ı mezbûrân mesâhalarıyla tûlen iki buçuk zirâ‘ ve arzen bir buçuk ve kadden kezâlik bir buçuk zirâ‘ bozacı bacasıyla tûlen üç zirâ‘ üç parmak ve arzen iki zirâ‘ on sekiz parmak ve kadden üç zirâ‘ tahta-pûşun bizimle sâir ahâlî-i mezbûrûnun makarr-ı nisvân olan mahallerine nezâret olup ve bu makūle bozacı bacasıyla tahta-pûş binâsı bâ-emr-i âlî memnû‘âtdan olmağla ref‘ olunması bizim ve hâzirûn-ı merkūmûnun matlûbumuzdur dediklerinde fi’l-hakīka zikr olunan bozacı bacasıyla tahta-pûşun müdde‘iyân-ı mezbûrân ile sâir ahâlî-i mahalle-i mezbûrûnun makarr-ı nisvân olan mahallerine nezâreti olup ve bu makūle bozacı bacasıyla tahta-pûş binâsı bâ-emr-i âlî memnû‘âtdan olduğunu mimârân-ı mezbûrân ve sâir sikāt-ı Müslimîn haber verdiklerini mezbûr dâ‘îleri mahallinde ketb ve tahrîr ve ma‘an meb‘ûs ümenâ-i şer‘den Çukadâr es-Seyyid Süleyman Ağa b. es-Seyyid Halil ve Muhzır Mehmed Emin b. Hâfız Mustafa ile meclis-i şer‘a inhâ etmeğin mezbûrân es-Seyyid el-Hâc Süleyman ve vâlidesi Şerîfe Hadice Hatun’un hilâf-ı emr-i âlî ihdâs eyledikleri bozacı bacası tahta-pûşun ref‘i bâlâ-yı i‘lâmımız fermân-ı âlîleri sudûruna mütevakkıf idüğü İstanbul Mahkemesi’nden huzûr [-ı âlîlerine i‘lâm olundu.] Fî 15 Za sene 1236