İstanbul Mahkemesi 137 Numaralı Sicil (H.1236-1238 / M 1821-1822) cilt: 86, sayfa: 73 Hüküm no: 28 Orijinal metin no: [6b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Cihânbeyli aşiretinin Anadolu’dan İstanbul’a getirdiği koyun ve keçilerin kasap esnafına dağıtımı Cihânbeylilerin ağnâm mübâya‘ası 12.560 aded, keçi 340 aded Ma‘rûz[-ı dâ‘î-i devlet-i aliyyeleridir ki] Anadolu’da Cihânbeyli Ekrâdından olup bu def‘a dahi Der-aliyye’ye cem‘an on iki bin beş yüz altmış re’s Karaman ağnâmı ve üç yüz kırk re’s keçi sevk ve tesyîr eden celeb tâifesinden ve dört yüz altmış re’s ganemin mâliki Ömer b. Abdullah ve bin re’s ganemin mâliki Emir İsmail ve yedi yüz re’s ganemin mâliki Hızır oğlu el-Hâc Musa ve yedi yüz seksen re’s ganemin mâliki Ali oğlu Mehmed ve bin re’s ganemin mâliki Kanber oğlu Mehmed ve yedi yüz re’s ganemin mâliki el-Hâc Hasan ve yedi yüz elli re’s ganemin mâliki Musa oğlu Musa ve yedi yüz re’s ganemin mâliki Kabeş?oğlu Mustafa ve ve dört yüz re’s ganemin mâliki Serdaroğlu Osman ve beş yüz elli re’s ganemin mâliki Ebûbekir oğlu Mehmed ve üç yüz elli re’s ganemin mâliki Cihânbeyli Osman ve altı yüz yirmi re’s ganemin mâliki Cihânbeyli Haydar ve üç yüz re’s ganemin mâliki Bayrakdâroğlu Ali ve beş yüz elli re’s ganemin mâliki Mustafa oğlu Mehmed ve sekiz yüz re’s ganemin mâliki Murad oğlu Hasan ve yedi yüz re’s ganemin mâliki Pekmezci oğlu Mustafa ve sekiz yüz re’s ganemin mâliki Ali Ağa ve yedi yüz re’s ganemin mâliki Berber oğlu Tayyar ve yedi yüz re’s ganemin mâliki Cihânbeyli Resul ve iki yüz kırk re’s keçinin mâliki Cihânbeyli Yusuf ve yedi yüz re’s keçinin mâliki merkūm Pekmezci oğlu Mustafa’dan her biri tâife-i merkūmenin bey‘leri es-Seyyid Mustafa Bey ile Bosna celebânından olup işbu sene-i mübâreke mevsim-i baharında Âsitâne-i aliyyeye külliyetli ağnâm sevk edenlerden Karayobi? oğlu Vatho ve Matya ve Bovıç oğlu Panço ve Sapod ve Filibeli Nabdan ve Habak oğlu Velko ve Edirneli Kanco zimmîler hâzır oldukları hâlde kassabân esnâfının kethüdâları el-Hâc Hasan Ağa b. el-Hâc Osman mahzarında her biri takrîr-i kelâm edüp biz ber-vech-i muharrer mâlikler olduklarımız hayvânât-ı mezkûreyi bundan akdemce bâ-fermân-ı âlî verilen nizâm üzere lühûmunun beher kıyyesini kassabân esnâfına otuz yedi para ve kuyruklarının beher kıyyesini kırk para ve ağnâm sakatlarını on para ve keçi sakatlarını beş para i‘tibâriyle kassabân esnâfına tevzî‘ içün kethüdâ-yı merkūm el-Hâc Hasan Ağa’ya teslîme ve kethüdâ-yı merkūm dahi ağnâm-ı mezkûrenin mikdâr ve semenlerini mübeyyin yaftalarını hîn-i tevzî‘inden yirmi bir gün mürûrunda ve akçelerini hîn-i tevzî‘inden otuz bir gün mürûrunda esnâfından cem‘ ve tahsîl-birle bize tamamen îfâya ve lühûmunun beher kıyyesini narh-ı cârî üzere kırkar paraya ve kıvırcığın [7a] beher kıyyesini kırk üçer paraya ibâdullâha bey‘e hâlâ hâssa kasabbaşısı efendinin inzâm-ı re’yi ile ta‘ahhüd ve tarafeynden her birimiz âharın ta‘ahhüdünü kabûl eyledik dediklerini kethüdâ-yı merkūm ba‘de’t-tasdîk Bosna celebleri hâzirûn-ı mesfûrûnun ağnâmları mevsim-i şitâda gelmek takrîbiyle mesârif-i kesîreye dûçâr olduklarından celebân-ı mesfûrûnun ağnâmları sekiz gün ve Karaman ağnâmı iki gün tevzî‘ olunmak üzere nizâma rabt olunmuş ise de Bosna celebleri hâzirûn-ı mesfûrûnun ağnâmları kalîl kaldığına mebnî bu def‘a Bosna ağnâmı dört gün ve Karaman ağnâmı sekiz gün tevzî‘ olunmasında cümlesi terâzî ve ittifâk eyledikleri İstanbul Mahkemesi’nden huzûr [-ı âlîlerine i‘lâm olundu.] Fî 6 Za sene 1236