İstanbul Mahkemesi 137 Numaralı Sicil (H.1236-1238 / M 1821-1822) cilt: 86, sayfa: 76 Hüküm no: 31 Orijinal metin no: [7b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Artin v. Asvador’un tömbeki alacağından Haçador v. Sinayel’in zimmetini ibrâ ettiği Deyn mukābelesinde tönbakü ahzı 14.100 guruş Ma‘rûz[-ı dâ‘î-i devlet-i aliyyeleridir ki] Arzuhâl eden Vanlı Artin v. Asvador nâm zimmî meclis-i şer‘-i münîrde derûn-ı arzuhâlde mastûrü’l-ism Vanlı Haçador v. Sinayel zimmî muvâcehesinde benim mersûm Haçador zimmîye yedinden ve mâlından ceste ceste iktirâz ve kabz ve umûruma sarfla istihlâk eylediğim on dört bin yüz guruş zimmî-i mesfûr zimmetimde deynim olmağla meblağ-ı mezkûrun yüz elli guruşunu nakden ve on iki bin yüz kırk dokuz guruş mukābelesinde dahi yedimde mâlım olan gayr-ez tura bin beş yüz altmış beş vakıyye Şiraz tönbaküsünu beher kıyyesini yedişer guruşa ve gayr-ez tura yüz doksan dokuz vakıyye İsfehan tönbakusunu beher kıyyesini altışar guruşa mersûm Haçador zimmîye bey‘ ve teslîm ve semenleri olan cem‘an on iki bin yüz kırk dokuz guruşu meblağ-ı mezkûr on iki bin yüz kırk guruşa takāsen ibkā edüp bâkīsi olan bin sekiz yüz guruşa dahi benim İstanbul’da Mahmudpaşa-i Velî Câmi‘-i şerîfi civârında Sultan Odaları demekle meşhûr bir bâb handa mütemekkin Tönbakucu Filibos v. Atam zimmî zimmetinde cihet-i deyn-i şer‘iyye alacağım olan bin sekiz yüz guruş deyn-i mezkûruma mahsûben mersûm Filibos zimmîden ahz etmek üzere tarafımdan dâyinim mersûm Haçador zimmîyi tevkîl eylediğimde ol dahi ber-vech-i muharrer vekâlet-i merkūmeyi kabûl edüp ol vechile meblağ-ı mezkûr on dört bin yüz guruşdan benim ve semen-i mezkûrlardan mesfûr Haçador’un zimmetimiz berî’e olmuşdur dediğini merkūm Haçador zimmî bi’l-muvâcehe tasdîk eylediği İstanbul Mahkemesi’nden huzûr [-ı âlîlerine i‘lâm olundu.] Fî 22 Za sene 1236