İstanbul Mahkemesi 137 Numaralı Sicil (H.1236-1238 / M 1821-1822) cilt: 86, sayfa: 77 Hüküm no: 32 Orijinal metin no: [7b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Kirkor v. Bedros’un, Hüsrev Efendi vakfından icareli berber dükkânı gediğini Numan Usta’ya sattığı Berber gediği mübâya‘a ve nakli Ma‘rûz[-ı dâ‘i-i devlet-i aliyyeleridir ki] İşbu arzuhâl hâmişinde mastûr derkenâr mûcebince İstanbul’da Çatal Han derûnunda vâki‘ başmuhâsebe kaleminde mukayyed bâ-sûret Ağyazar zimmî ismine mukayyed olan bir bâb berber dükkânı derûnunda mevcûde gedik âlât-ı lâzıme-i ma‘lûmenin tedâvül-i eyâdî ile hâlâ mâliki Kirkor v. Bedros zimmî meclis-i şer‘-i münîrde berberân esnâfının Şeyh[i] es-Seyyid el-Hâc Osman Efendi ve Kethüdâsı İbrahim Ağa ve du‘âcısı el-Hâc Abdullah Efendi ve Yiğitbaşısı es-Seyyid Mehmed Nuri Ağa ve Çavuşları Mustafa Çavuş ve Ahmed Usta ve diğer Ahmed Usta ve Ali Usta ve sâir mazbûtü’l-esâmî ustalarıyla İstanbul’da Hoca Pîrî Câmi‘-i şerîfi kapısı karşısında sokakda Sepetçi Hanı zahrında vâki‘ olup mukaddemâ kârgîr mahzen iken bundan akdem berber dükkânı olan merhûm Hüsrev Efendi vakfından bir bâb berber dükkânın[ın] bâ-temessük-ı mütevellî bi’l-icâreteyn-i münâsafa mutasarrıfları es-Seyyid Süleyman Efendi ve Şerîfe Azîme Hanım veledey es-Seyyid el-Hâc İbrahim Ağa b. Abdullah tarafından husûs-ı âtîde vekâleti bi’l-ma‘rifeti’ş-şer‘iyye zât-ı mezbûreyi ârifân Berber Ali Usta b. Mustafa ve diğer Ali Usta b. Ali şehâdetleriyle sâbit olan es-Seyyid Hüseyin Ağa b. el-Hâc Halil’den her biri hâzır oldukları hâlde es-Seyyid Numan Usta b. Salih mahzarında ben ber-vech-i muharrer Çatal Han derûnunda olan dükkân-ı merkūmda şirâen mâlik olduğum mu‘teber gedik âlât-ı lâzıme-i mezkûresini bi-safkatin vâhidetin yüz guruş semen-i medfû‘ ve makbûza bey‘-i bâtt-ı sahîh-i şer‘î ile mezbûr es-Seyyid Numan Usta’ya bey‘ ve temlîk ve teslîm eylediğimde ol dahi ber-minvâl-i muharrer iştirâ ve temellük ve tesellüm ve kabûl edüp mebî‘-i mezkûrun tağrîr ve gabnine müte‘allika âmme-i da‘vâdan tarafeynden her birimiz âharın zimmetini kabûlü hâvî ibrâ etmemizle ba‘de’l-yevm âlât-ı gedik-i mezkûrda benim alâkam kalmayup merkūm es-Seyyid Numan Usta’nın mâl-ı müşterâsı olmuşdur dediğini merkūm es-Seyyid Numan Usta bi’l-muvâcehe ba‘de’t-tasdîk vekîl-i hâzır-ı merkūm es-Seyyid Hasan Ağa zikr olunan Sepetçi Hanı zahrında olan kârgîr berber dükkânını müvekkilleri merkūmân es-Seyyid Süleyman Efendi ve Şerîfe Azîme Hanım’ın bin iki yüz yirmi yedi senesi hilâlinde şehriye altışar guruş kir[â] kavliyle merkūm es-Seyyid Numan Usta’ya îcâr ve teslîm ve kabûl edüp derûnunda târih-i merkūmdan berü müsteciren sâkin olduğunu ve merkūm es-Seyyid Numan Usta’nın mesfûr Kirkor zimmîden iştirâ eylediği gedik-i [8a] mezkûru müşteri-i merkūm es-Seyyid Numan Usta talebiyle dükkân-ı mezkûra nakline müvekkilleri merkūmânın râzılar olduklarını ve kârgîr dükkân-ı mezkûrda bir kimesnenin mukayyed ve mu‘teber gediği olmadığını esnâf-ı hâzirûn-ı merkūmûn ile ma‘an bi’l-vekâle takrîr ve bu makūle aklâma mukayyed ve mu‘teber gedik âlâtı kurb ve civârında vâki‘ âharın gediğinden ârî dükkâna mutasarrıfları rızâlarıyla naklolunmak ber-mantûk-ı derkenâr şürût-ı nizâmlarından olduğunu bi’l-cümle kethüdâ ve esnâf-ı hâzirûn-ı merkūmdan her biri ihbâr dahi etmeleriyle zikr olunan Çatal Han derûnunda olan mukayyed dükkân-ı mezkûrun kaleminde olan kaydı terkīn ile derûnunda olan gedik âlâtının sâlifü’l-beyân Hoca Pîrî Câmi‘-i şerîfi karşısında sokakda Sepetçi Hanı zahrında olan dükkâna ber-vech-i muharrer mutasarrıfları izin ve rızâlarıyla nakline ruhsat-birle âlât-ı gedik-i mezkûrun Ağyazar ismine olan kaydı ref‘ ve müşteri-i merkūm es-Seyyid Numan Usta ismine kayd ve nakli tasrîhiyle yedine sûret i‘tâsı bâbında fermân-ı âlîleri sudûru niyâzında oldukları İstanbul Mahkemesi’nden huzûr [-ı âlîlerine i‘lâm olundu.] Fî 13 Za sene 1236