İstanbul Mahkemesi 137 Numaralı Sicil (H.1236-1238 / M 1821-1822) cilt: 86, sayfa: 80 Hüküm no: 36 Orijinal metin no: [8b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Boyacı Aksato v. Todori’nin, Bağdâdî Hacı Mehmed Emin’e olan borcunu ödemesi gerektiği Arz odasında hüküm 1.500 guruş, Bağdâdî’nin Ma‘rûz[-ı dâ‘i-i devlet-i aliyyeleridir ki] Sâhib-i arzuhâl Bağdâdî es-Seyyid el-Hâc Mehmed Emin b. el-Hâc Mustafa nâm kimesne Çarşamba günü arz odasında huzûr-ı lâmi‘u’n-nûr-ı hazret-i Sadr-ı a‘zamîde ma‘kūd meclis-i şer‘-i enverde arzuhâlde mastûrü’l-ism Boyacı Aksato v. Todori zimmî muvâcehesinde mersûm Aksato zimmî zimmetinde işbu bin iki yüz otuz altı senesi Muharremi’l-harâmı’nın on beşinci günü yedimden ve mâlımdan iştirâ ve kabz eylediği bin yüz vakıyye zerdecâv boyası semeninden iki bin dört yüz yetmiş beş guruş alacak hakkımın dokuz yüz yetmiş guruşunu bundan akdemce mersûmun yazıcısı Kalovi zimmî ma‘rifetiyle ahz etmemle bâkīsi olan bin beş yüz guruşu mersûm Aksato zimmîden taleb ederim deyü da‘vâ ettikte ol dahi cevâbında ikrâr lâkin meblağ-ı mezbûr bin beş yüz beş guruş içün sene-i merkūme Ramazanı’nın üçüncü günü İstanbul’da Lanka Yenikapısı hâricinde vâki‘ dükkânımda mecmû‘u bin altı yüz beş guruşa râyic yirmi Macar ve on Sûrîn altınlarıyla iki yüz aded ufak parayı müdde‘î-i merkūma verüp teslîmimden ziyâde olarak zimmetinde yüz guruş hakkım ta‘alluk etmişken müdde‘î-i merkūm benim teslîmimi külliyen münkir olarak bi-gayr-ı hakkın yüz elli guruşumu dahi ahz etmişdi deyü ba‘de’d-def‘ ve’l-inkâr mersûm Aksato zimmî ber-vech-i muharrer def‘-i mezkûruna şâhid olmak üzere ikāme eylediği Boğaziçi’nde Mîrgûnoğlu nâm mahalde sâkin Yakub b. Osman nâm kimesne zimmî-i mersûm husûs-ı mezkûra seksen guruş kavliyle beni şehâdet-i zûr etmek içün getirdi husûs-ı mezkûr kat‘a mâlumum değildir deyüp ve mersûm Aksato zimmî şâhid-i âdil-i âhar ikāmesinden aczini ifâde edüp talebiyle müdde‘î-i merkūme muvâcehesinde yemîn verilmeğin mûcebiyle mersûm Aksato zimmî def‘-i mezkûruyla müdde‘î-i merkūma bilâ-beyyine mu‘ârazadan ba‘de’l-men‘ alâ-mûcebi ikrârihi meblağ-ı mezbûr bin beş yüz guruşu müdde‘î-i merkūma edâ ve teslîme bi’t-taleb mesfûr Aksato zimmîye tenbîh olunduğu İstanbul Mahkemesi’nden huzûr [-ı âlîlerine i‘lâm olundu.] Fî 16 Za sene 1236