İstanbul Mahkemesi 137 Numaralı Sicil (H.1236-1238 / M 1821-1822) cilt: 86, sayfa: 81 Hüküm no: 37 Orijinal metin no: [8b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Kürkçü Dimitri v. Tanaş’ın, Mustafa Şemseddin Efendi’den kiraladığı kürkçü dükkânını tahliye edeceği Arz odasında Ayasofya’da kürkçü dükkânından ihrâc i‘lâmı Ma‘rûz[-ı dâ‘i-i devlet-i aliyyeleridir ki] Mübârek rikāb-ı kamer-tâb-ı hüsrevâneye takdîm olunan işbu arzuhâlde zikr ve beyân olunduğu üzere İstanbul’da Ayasofya-i Kebîr Câmi‘-i şerîfi havlusuna nâzır Haremeyn-i Muhteremeyn vakfından ma‘lûmü’l-hudûd bir bâb kebîr konak ile ittisâlinde vâki‘ bir bâb kârgîr kürkçü dükkânının bi’l-icâreteyn mutasarrıfesi Saraylı Mirât Kadın bt. Abdullah tarafından husûs-ı âtîde vekîl-i müsecceli Mehmed Şefik Ağa b. Abdullah bi’l-ma‘iyye rü’yete memûr Harameyn-i şerîfeyn müfettişi mevâlî-i izâmdan Hatîbzâde fazîletlü es-Seyyid Mehmed Derviş Efendi hâzır olduğu hâlde müvekkile-i mûmâ-ileyhânın zevci müderrisîn-i kirâmdan Benlizâde Mustafa Şemseddin Efendi mevcûd iken Çarşamba günü arz odasında huzûr-ı lâmi‘u’n-nûr-ı hazret-i Sadr-ı a‘zamîde ma‘kūd meclis-i şer‘-i enverde dükkân-ı mezkûr derûnunda mevcûde olup işbu arzuhâl hâmişinde mastûr başmuhâsebe kalemi derkenârında zımnen şürût-ı nizâma dâhil olduğu müstefâd olan kürkçü gediği âlât-ı lâzıme-i ma‘lûmesinin Çorlu kasabası hâkiminin imzâ ve hatmini hâviye bir kıt‘a mübâya‘a hücceti mantûkunca şirâen mâliki arzuhâl eden Kürkçü Dimitri v. Tanaş zimmî ile bi’d-defa‘ât terâfû‘larında mersûm Dimitri zimmî dükkân-ı mezkûrda şehriye üç guruş kirâ ile müşâhereten müvekkilenin müsteciri olup lâkin dükkân-ı mezkûr ittisâlinde vâki‘ konak-ı mezkûr havlusunun iki cânibi kârgîr dükkânları olduğundan be-gāyet dayyîk ve konak-ı mezkûr bir ahıra muhtâc olduğundan müvekkilem merkūme dükkân-ı mezkûr verâsından kapı küşâdıyla dükkân-ı mezkûru ahır yapmak içün konak-ı mezkûra ilhâk irâdesiyle işbu târih-i i‘lâm şehri gāyetine muzâfen mersûm Dimitri zimmî ile bi’t-terâzî fesh-i akd-i icâre etmekle dükkân-ı mezkûru gāyet-i şehr-i mezkûrda tahliye ve müvekkilem merkūmeye teslîme mersûm Dimitri zimmîye tenbîh olunması bi’l-vekâle murâdımdır dedikde ol dahi husûs-ı mezkûru ba‘de’l-ikrâr dükkân-ı mezkûru gāyet-i şehr-i mezkûrda tahliye ve mutasarrıfesi müvekkile-i merkūmeye teslîme mesfûr Dimitri zimmî ve mersûm Dimitri zimmînin dükkân-ı mezkûrun mukaddemâ ta‘mîrine bir kimesnenin izinsiz masrûfu olan üç yüz guruşu kendi mâlından teberru‘an zimmî-i mesfûra [9a] teslîme hâzır-ı mûmâ-ileyh Mustafa Şemseddin Efendi rızâsıyla huzûr-ı âsıfânelerinde ba‘de’t-ta‘ahhüd mersûm Dimitri zimmî meblağ-ı mezkûr üç yüz guruşu ahzı mûmâ-ileyhden tamamen ahz ü kabz eylediğini du‘âhânemizde ma‘kūd meclis-i şer‘de vekîl-i merkūm muvâcehesinde ikrâr ve meblağ-ı mezkûr üç yüz guruşdan efendi-i mûmâ-ileyh bir akçe kalmadığını i‘tirâf eylediği İstanbul Mahkemesi’nden huzûr [-ı âlîlerine i‘lâm olundu.] Fî 28 Za sene 1236