İstanbul Mahkemesi 137 Numaralı Sicil (H.1236-1238 / M 1821-1822) cilt: 86, sayfa: 90 Hüküm no: 46 Orijinal metin no: [11b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Firari Bezzâz İstefan v. Yorgi’nin dükkânının kilidi açılarak içerisindeki malların Maruke Nasrâniye’ye teslim edildiği Mefkūd i‘lâmı Ma‘rûz[-ı dâ‘î-i devlet-i aliyyeleridir ki] Sâdır olan fermân-ı âlişâna imtisâlen işbu arzuhâle ba‘de’n-nazar İstanbul’da Çarşı-yı Kebîr’de bezzâzistân-ı atîk civârında sahaflar içinde kâin bir tarafdan Çukacı Yanko zimmî mağazası ve bir tarafdan Çukacı Mike zimmî dükkânı ile mahdûd bir bâb kârgîr bezzâz mağazası sâhibe-i arzuhâl mu‘arrefetü’ş-şahs Çukacı Mike zimmî Maruke Nasrâniyenin taht-ı icâresinde ve derûnunda mevcûde beyne’l-hiref gedik tâ‘bir olunur üç çuka minder ve iki peştahta ve altı çuka yasdık ve bir akçe tahtası ve bir endâze ve bir mengene ve sâir âlât-ı lâzıme-i ma‘lûme yedinde mülkü olup mağaza-i merkūme ve âlât-ı mezbûrda müşâhereten müstecir olan mersûme Maroke Nasrâniyenin hâlâ zevci Bezzâz İstefan v. Yorgi zimmîye müddet-i vafireden berü iflaskâri olduğundan mağaza-i merkūmeyi mukaffelen terk ve diyâr-ı âhara gidip hayat ve memâtı ma‘lûm olmayup el-hâletü hâzihî mağaza-i merkūme mukaffel kalıp ve kirâsını dahi bir mahalde n havâle etmediğinden sâhibe-i arzuhâl mersûma gadri mûceb olduğundan muntasıf-ı şehrde fesh-i akd-i icâre eylediğinden ma‘rifet-i şer‘le lede’t-tahkīk oda-i merkūmenin kuflu küşâd ve kendüye teslîm olunmasını işbu arzuhâliyle mersûme Maroke Nasrâniye istid‘â ve husûs-ı merkūmu taharrî ve tahkīk-birle istikşâf-ı hâl içün kıbel-i şer‘den irsâl olunan Kâtib Mehmed Azîz Efendi dâ‘îleri mahalline varup husûs-ı merkūmun keyfiyetini suâl ettikte hakīkat-i hâl sâhibe-i arzuhâlin bast ü beyân eylediği minvâl üzre olduğunu Şam tüccârından el-Hâc Mehmed Ağa ve Örücü Ahmed Ağa ve Acem tüccârlarından İsmail Ağa ve el-Hâc Tahir Ağa ve Ali Ağa ve Hüseyin Ağa ve hâlâ bezzâz esnâfının kethüdâsı Derviş Mehmed Ağa ile Yiğitbaşısı Mıgırdıç ve ustalarından kabz-ı mâl Gırabet ve Usta Sorope ve Avanes ve Asker oğlu Kirkor zimmîler ve sâirleri ba‘de’l-ihbâr muhbirûn-ı merkūm[un] ile oda-i merkūmun kuflunu [f]ek derûnunda gāib-i mersûmun mâlı olmak üzere zuhûr edüp ma‘rifet-i şer‘le tahrîr ve kıbel-i şer‘den kayyım nasb olunan mezbûr kethüdâ Derviş Mehmed Ağa b. el-Hâc İbrahim’e mümzâ ve mahtûm defteriyle eşyâyı ve oda-i merkūme ile âlât-ı gedik-i merkūmu dahi sâhibe-i arzuhâl mersûme Maroke Nasrâniye’ye teslîm eylediğini kâtib-i merkūm dâ‘îleri mahallinde tahrîr ve ma‘an mürsel ümenâ-i şer‘le meclis-i şer‘a gelüp alâ-vukū‘ihi inhâ ve takrîr eylediği İstanbul Bâb mahkemesinden huzûr [-ı âlîlerine i‘lâm olundu.] Fî 21 Za sene 1236