İstanbul Mahkemesi 137 Numaralı Sicil (H.1236-1238 / M 1821-1822) cilt: 86, sayfa: 89 Hüküm no: 45 Orijinal metin no: [11b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ancilaki v. Forto’nun, Yuvakim v. Kaplan aleyhine açtığı alacak davasında iddiasını ispat edemediğinden muarazadan men edildiği Men‘, 918 guruş 30 para anison akçesi Ma‘rûz[-ı dâ‘î-i devlet-i aliyyeleridir ki] Arzuhâlde isimleri mastûr Nemçelü Ancilaki v. Forto Nato ve şerîki Abram v. Lazar bi’t-terâzî meclis-i şer‘de tercümân tarafından kapıoğlanı Rafail hâzır olduğu hâlde arzuhâl eden Galata’da balık tuzlayıcısı Yuvakim v. Kaplan zimmî muvâcehesinde işbu târih-i i‘lâmdan her ay mukaddem mersûm Yuvakim yedimde iki bin iki yüz yirmi altı buçuk vakıyye anison vardır size beher kıyyesini otuz altı paraya bey‘ edeyim demekle biz dahi mâl-ı müşterekimiz olan iki bin guruşu ber-vech-i peşin zimmî-i mersûma ba‘de’t-teslîm meblağ-ı mezbûr iki bin guruşun bin seksen bir guruş on parası mukābelesinde bize bin iki yüz beş vakıyye anison bey‘ ve teslîm edüp bâkīsi olan dokuz yüz on sekiz guruş otuz para mersûm Yuvakim zimmî yedinde kalmağla meblağ-ı bâkī-i mezbûru zimmî-i mersûmdan geri taleb ederiz deyü da‘vâ ettiklerinde ol dahi külliyen inkârından mâ‘adâ işbu arzuhâl hâmişinde olup hâlâ Galata Kādısı fazîletlü sa‘âdetlü es-Seyyid Mehmed Sâdık Efendi hazretlerinin hatmiyle mahtûm murâfa‘adan verilen bir kıt‘a i‘lâm-ı şer‘î mantûkunca şerîkân-ı müdde‘iyân-ı mersûmân beni hâkim-i mûmâ-ileyh huzûruna götürüp meblağ-ı mezkûr iki bin guruşu şerîkim gāib ani’l-beled Luka zimmîye verüp ve meblağ-ı mezbûrun bin seksen guruş on parasını vech-i muharrer üzere gāib-i mesfûrdan istîfâ eylediklerini ikrâr edüp ve meblağ-ı bâkī-i mezbûr dokuz yüz on sekiz guruş otuz parayı mücerred ben gāib-i mersûmun şerîki olduğuma binâen benden taleb eylemeleri şer‘an mesmû‘a olmamağla hâkim-i mûmâ-ileyh müdde‘iyân-ı mersûmânın da‘vâlarına iltifât etmeyüp bana bî-vech mu‘ârazadan her birisini men‘ etmişidi deyü mazmûnu takrîrine mutâbık i‘lâm-ı mezkûr ibrâzıyla eylediği def‘ini ve mazmûn-ı i‘lâm-ı mezkûru lede’t-tezkiye adâletleri zahîre mahkeme-i mezbûre muhzırânından Molla Abdullah b. Musa ve Ahmed Ağa b. İbrahim şehâdetleriyle bi’l-muvâcehe isbât etmeğin müdde‘iyân-ı mersûman bu def‘a dahi da‘vâ-yı mezkûreleriyle mersûm Yuvakim zimmîye bî-vech mu‘ârazadan men‘ olundukları İstanbul Bâb mahkemesinden huzûr [-ı âlîlerine i‘lâm olundu.] Fî 29 Za sene 1236