İstanbul Mahkemesi 137 Numaralı Sicil (H.1236-1238 / M 1821-1822) cilt: 86, sayfa: 103 Hüküm no: 60 Orijinal metin no: [14b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Yorgi v. Dimitri ile Manolaki v. İstirati’nin alacak davasında birbirlerinin zimmetlerini ibrâ ettikleri Yaldızlıhan sarraflarının on iki bin beş yüz guruş mutâlebesi Ma‘rûz[-ı dâ‘î-i devlet-i aliyyeleridir ki] İstanbul’da Yaldızlı Han sarraflarından derûn-ı arzuhâlde mastûrü’l-ism Yorgi v. Dimitri nâm zimmî bi’t-terâzî du‘âhânemizde ma‘kūd meclis-i şer‘-i münîrde zeyt yağcı esnâfından Manolaki v. İstirati zimmî muvâcehesinde benim Yunda Adası Voyvodası iken bundan akdemce vefât eden Giridî Mazlum Ağa’dan külliyetli matlûbum olmağla müteveffâ-i merkūm hayâtında mersûm Manolaki zimmînin şerîki olan gāib ani’l-beled Lazoğlu Anton v. Komitaki zimmîye mahallinde mâlından on iki bin beş yüz guruş verüp ol dahi yedinden ba‘de’l-ahz meblağ-ı mezbûr on iki bin [15a] beş yüz guruşu Der-aliyye’de merkūm Mazlum Ağa’nın ta‘yîn edeceği kimesneye vermek üzere gāib-i mersûm Lazoğlu Anton zimmî merkūm Mazlum Ağa’ya işbu sene-i mübârekede duhûl eden Nisanın yirmi altıncı günü ile müverrah bir kıt‘a poliçe temessükü verdikde merkūm Mazlum Ağa zikr olunan poliçe temessükünü ahz ve bana irsâl-birle havâle-i merkūmeyi mesfûr Manolaki zimmîye havâle ve ba‘de’l-kabûl mersûm Manolaki zimmîden kendisinde olan alacağıma mahsûben ahza bâ-mektûb tarafından beni tevkîl ettiğine binâen ben mersûm Manolaki zimmîye havâle-i mezkûreyi bi’l-vekâle ifâde eylediğimde mersûm Manolaki zimmî benim vekâletimi tasdîk ve şerîki gāib-i mersûmun müteveffâ-i merkūm Mazlum Ağa’ya olan deyn-i mezkûruna dâmin olarak havâlesini kabûl ve yirmi bir gün mürûrunda bana teslîme ta‘ahhüd etmişken yirmi bir gün mürûrunda ben meblağ-ı mezbûr on iki bin beş yüz guruşu mersûm Manolaki zimmîden bi’l-vekâle taleb eylediğimde şerîkimden bana mektûb zuhûr eyledi Mazlum Ağa’dan bir akçe ve bir habbe almayıp merkūm Mazlum Ağa mahallinde şerîkime ol mikdâr guruş kıymetli zeyt yağı vereceğine inandırdığından nâşî temessük-ı merkūmu vermiş ba‘dehû merkūm Mazlum Ağa şerîkime bir nesne vermeyecek olduğundan havâle-i mezkûreyi kabûlden beni men‘ ve nehy eyledi deyü meblağ-ı mezbûru bana teslîmden imtinâ‘ ben dahi merkūm Mazlum Ağa’ya mektûb tahrîriyle ifâde etmek üzere iken merkūm Mazlum Ağa vefât etmişidi el-hâletü hâzihî havâle-i mezkûreye binâen meblağ-ı mezbûr on iki bin beş yüz guruşu müteveffâ-i merkūm Mazlum Ağa’da olan alacağıma mahsûben kabza vekîl olmamla bana edâya mersûm Manolaki zimmîye haber olunmak murâdımdır deyü mersûm Manolaki zimmînin inkârına mukārin tasaddî eylediğim da‘vâm merkūm Mazlum Ağa’nın fevtiyle tarafından vekâlet-i mezkûrem şer‘an bâtıla olduğundan meblağ-ı mezkûru mersûm Manolaki zimmîden bi’l-vekâle mutâlebem meşrû‘a olmadığı bana tefhîm olunup ve merkūm Mazlum Ağa’nın veresesi ma‘lûmum ve meblağ-ı mezkûr on iki bin beş yüz guruşu mersûm Manolaki zimmînin vech-i muharrer üzere kabûlüne şâhidlerim olmayup kavl-i mücerredimden ibâret olduğundan ben müteveffâ-i merkūmda olan hukūkumu veresesi zuhûrunda terekesinden taleb etmek iktizâ etmeğin ol vechile mersûm Manolaki zimmî ile meblağ-ı mezkûr on iki bin beş yüz guruşa müte‘allika aslâ ve kat‘â da‘vâ ve nizâ‘ ve husûmetim yokdur deyü tarafeynin takrîr ve tasdîkleri İstanbul Mahkemesi’nden huzûr [-ı âlîlerine i‘lâm olundu.] Fî 12 Zilhicce sene 1236