İstanbul Mahkemesi 137 Numaralı Sicil (H.1236-1238 / M 1821-1822) cilt: 86, sayfa: 102 Hüküm no: 59 Orijinal metin no: [14b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Yako v. Mosi ve Yako v. Manasa’nın, Nikola v. Mardiros’a olan borçlarını ödemeyi kabul ettikleri Üç bin iki yüz elli guruş edâ Ma‘rûz[-ı dâ‘î-i devlet-i aliyyeleridir ki] Derûn-ı arzuhâlde mastûrü’l-ism İncüci Nikola v. Mardiros nâm zimmî bi’t-terâzî du‘âhânemizde meclis-i şer‘-i münîrde arzuhâl eden İncüci Yako v. Mosi ve diğer Yako v. Manasa nâm Yahûdiler muvâcehelerinde şerîkân-ı mersûmân zimmetlerinde bundan akdem yedimden ve mâlımdan iştirâ ve kabz eyledikleri miskāl ve fiyatı beynimizde ma‘lûm incü semeninden gayr-ez teslîmât sahhe’l-bâkī üç bin yedi yüz yirmi beş guruş alacak hakkım olmağla hâlâ taleb ederim deyü da‘vâ ettikte onlar dahi cevâblarında ikrâr lâkin müdde‘î-i mersûm Nikola zimmî meblağ-ı mezkûr üç bin yedi yüz yirmi beş guruşun dört yüz yetmiş beş guruşunu bundan akdem mutlaka bize hibe etmekle zimmetimizde ancak üç bin iki yüz elli guruş deynimiz kalmışdır deyüp ve müdde‘î-i mersûm Nikola zimmî benim şerîkâ[n]-ı mesfûrânın zimmetlerinde semen-i mezbûrdan sene-i sâbıkā Ramazani’l-mübârekinde dört bin yedi yüz yirmi beş guruş alacağım var iken şerîkân-ı mersûmâna eğer meblağ-ı mezbûrun dört bin iki yüz elli guruşunu zikr olunan Ramazan şehrinden on [gün] tamamında def‘aten bana edâ edersiniz mâ‘adâsı olan dört yüz yetmiş beş guruşu sizin olsun deyüp ol şartla hibe etmişidim deyü da‘vâ ve tarafeynin vech-i meşrûh üzere olan hibe da‘vâları tarafeynin iltimâslarıyla fetâvâ-yı şerîfeye lede’l-havâle alâ-mûcebi ikrârihümâ meblağ-ı mezkûr üç bin iki yüz elli guruşun bi’t-taleb müdde‘î-i mersûm Nikola zimmîye edâsıyla mesfûrân Yako ve diğer Yahûdiler iltizâm olundukları İstanbul Mahkemesi’nden huzûr [-ı âlîlerine i‘lâm olundu.] Fî-gurre-i Za sene 1236