İstanbul Mahkemesi 137 Numaralı Sicil (H.1236-1238 / M 1821-1822) cilt: 86, sayfa: 105 Hüküm no: 62 Orijinal metin no: [15a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Todi ve Vide’nin alacak davasında Dimitri v. Aleksan ile sulh oldukları Nemçe tüccârından boyacılarının iki bin guruş üzere sulh Ma‘rûz[-ı dâ‘î-i devlet-i aliyyeleridir ki] Derûn-ı takrîrde mastûrü’l-ism Nemçe tüccârından olup Der-aliyye’de mütemekkin iken bundan akdem hâlik olan Göncüoğlu Yasef v. Mosi nâm müste’menin hasran vârisleri zevcesi Todi bt. Hanna nâm Yahûdiye kebîr oğlu Rafail ve sagīr oğlu Mozi ve kebîr kızı Dide Yahûdiyeden mersûm Rafail Yahûdi asâleten ve sagīr-i mersûmun anası ve tesviye-i umûruna vasîsi zevce-i mersûme Todi Yahûdiye ile mersûme Dide Yahûdiye taraflarından husûs-ı âtîde vekâleti şahıslarını bilir Samarya v. Yasef ve Çelbon v. Hana Yahûdiler şehâdetleriyle sâbit olan Kemel v. Danyel Yahûdi vekâleten tercümânı Iklili hâzır olduğu hâlde meclis-i şer‘-i münîrde Havâss-ı Refî‘a kazâsına muzâfe kasaba-i Hasköy’de selhhâne iskelesinde vâki‘ ma‘lûmü’l-hudûd bir bâb boyacı dükkânı derûnunda mevcûde beyne’l-esnâf gedik tâ‘bir olunur âlât-ı lâzıme-i ma‘lûmesinin mâliki derûn-ı takrîr mastûrü’l-ism Dimitri v. Aleksan zimmî muvâcehesinde mersûm Dimitri zimmî bin iki yüz otuz üç senesi Saferi’l-hayrı gurresinden hâlik-i mersûmun sağlığında yedinden ve mâlından iktirâz ve kabz eylediği bin iki yüz guruş deyni mukābelesinde âlât-ı gedik-i mezkûru yedine rehin vaz‘ ve teslîm ettiğinde ol dahi yedinden irtihân ve tesellüm ve kabz ve kabûl ettikden sonra meblağ-ı mezbûru [15b] kable’l-ahz mersûm Yahûdi Yasef hâlik ve meblağ-ı mezbûr verese-i mezkûrelerine mevrûs olup ve zikr olunan hâlik-i mersûmun yedinde vech-i muharrer üzere rehin olduğu boyacı esnâfının kethüdâsı ve ustaları ihbârlarıyla zâhir olmağla meblağ-ı mezkûr iki bin guruşu bize edâ ile âlât-ı gedik-i mezkûru rehniyetden fek ve tahlîfe zimmî-i mersûma tenbîh olunması asâleten ve vekâleten murâdımızdır deyü da‘vâ eylediğimizde ol dahi cevâbında ikrâr lâkin meblağ-ı mezkûrun bin sekiz yüz guruşunu hâlik-i mersûma sağlığında edâ ve teslîm edüp zimmetimde ancak iki yüz deynim kalmışdır deyü ol mikdârda inkârımıza mukārin def‘a tasaddî ve ol vechile beynimizde ba‘de vukū‘ı’l-münâza‘a bâ-tavassut-ı muslihîn beynimiz ıslâh olunup mersûm Dimitri zimmî meblağ-ı mezbûr iki bin guruşdan sagīr-i mersûmun hissesi olan yedi yüz guruşu tamamen edâya ta‘ahhüd edüp ve mâ‘adâ bin üç yüz guruş müdde‘âmızdan dahi mersûm Dimitri zimmî ile bi’l-asâle ve bi’l-vekâle altı yüz guruş üzerine ba‘de akdi’l-musâlahati ve’l-kabûl meblağayn-ı mezkûreyn cem‘an bin üç yüz guruşdan mâ‘adâ ziyâdesine ve bi’l-cümle husûs-ı mezkûra müte‘allika âmme-i da‘vâdan mersûm Dimitri zimmînin zimmetini asâleten ve ancak mersûmetân Todi ve Vide Yahûdiyeler taraflarından vekâleten kabûlü hâvî ibrâ ve iskāt eyledik dediklerini mersûm Dimitri zimmî ba‘de’t-tasdîk asıl ve vekîl-i mersûmânın bi’t-terâzî imhâl ve takrîrlerine binâen meblağ-ı mezbûr bin üç yüz guruşun beş yüz guruşunu işbu târih-i i‘lâmdan otuz bir gün mürûrunda ve sekiz yüz guruşunu altmış bir gün mürûrunda müdde‘iyân asıl ve vekîl-i mersûmâna edâya bi’t-taleb mersûm Dimitri zimmî ta‘ahhüd ettikden sonra İstanbul’da Küçükkaraman’da Fıçıcı Efrem v. Şahin zimmî meclis-i şer‘de asıl ve vekîl-i mersûmân muvâcehelerinde medyûn-ı mersûm Dimitri zimmî mevcûd iken meblağ-ı mezkûr bin üç yüz guruşa vech-i muharrer üzere tarafeynden bi’l-emr ve’l-kabûl kefîl bi’l-mâl ve dâmin oldum deyü eylediği ikrârını dahi her biri tasdîk eyledikleri İstanbul Mahkemesi’nden huzûr [-ı âlîlerine i‘lâm olundu.] Fî 8 Zilhicce sene 1236