İstanbul Mahkemesi 137 Numaralı Sicil (H.1236-1238 / M 1821-1822) cilt: 86, sayfa: 106 Hüküm no: 63 Orijinal metin no: [15b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ali Ağa b. Abdullah’ın, Ahmed Ağa b. Mehmed’e olan borcunu ödemeyi kabul ettiği Taslık lüle taşı iki bin iki yüz elli guruş üzere sulh Ma‘rûz[-ı dâ‘î-i devlet-i aliyyeleridir ki] Sâhib-i arzuhâl el-Hâc Ahmed Ağa b. el-Hâc Mehmed meclis-i şer‘-i münîrde derûn-ı arzuhâlde mezkûrü’l-ism Ali Ağa b. Abdullah mahzarında bin iki yüz otuz beş senesi hılâlinde İstanbul’da Asmaaltı nâm mahalde vâki‘ sâkin olduğum mahzende ben on dört bin dokuz [yüz] yirmi üç guruş ve merkūm Ali Ağa kezâlik mâlından yedi bin dört yüz guruş ifrâz ve birbirine halt edüp hâle olan fâide beynimizde munsâfe taksîm olunmak üzere Eskişehir kazâsında çıkan taslık lüle taşı ticâretine akd-i şirket-i a‘yân-birle merkūm Ali Ağa meblağ-ı mezbûru iznimle ahz ü kabz ve kazâ-i merkūma getirip meblağ-ı mezbûrun yedi bin dört yüz bir guruş otuz parasını iznimsiz kazâ-i mezbûrda ma‘lûmü’l-esâmî kimesnelere bâ-murâbaha karz verüp mâ‘adâsıyla dahi mahallinde zikr olunan lüle taşı iştirâ ve Der-aliyye’ye getirip âhara bey‘ ve hâsıla olan esmânını ahz ü kabz eyledikden sonra ba‘de fesh-i akdi’ş-şirke merkūm Ali Ağa ile şirket-i mezkûremizin hesâbını işbu târih günü huzûr-ı Müslimînde hesâb-ı sahîh ile lede’r-rü’ye re’s-i mâl ve fâide-i hâsıladan benim hissem olarak merkūm Ali Ağa’nın zimmetinde ta‘lîk eden meblağ-ı ma‘lûmü’l-mikdârdan gayr-ez teslîmât sahhe’l-bâkī zimmetinde ikrârı mûcebince zuhûr eden iki bin iki yüz elli guruş hakkımı bana nakden deynine mahsûben varup ziyâdesiyle ahz etmek üzere tarafından beni tevkîl dâ‘iyesinde olduğuna ben râzı olmamla ol vechile beynimizde ba‘de vukū‘ı’l-münâza‘a el-hâletü hâzihî beynimiz ıslâh ve tevfîk olunup merkūm Ali Ağa meblağ-ı mezkûr iki bin iki yüz elli guruş hakkımı işbu târih-i i‘lâmdan yüz seksen bir gün mürûrunda def‘aten bana edâya ta‘ahhüd eyledi dediğini merkūm Ali Ağa ba‘de’t-tasdîk Laz Hüseyin Ağa b. Ahmed ve Alâiyyeli Çil el-Hâc Mahmudzâde es-Seyyid Halil Ağa’dan her biri meclis-i şer‘de merkūm el-Hâc Ahmed Ağa mahzarında medyûn-ı merkūm Ali Ağa mevcûd iken her biri takrîr-i kelâm edüp merkūm Ali Ağa’nın mezbûr el-Hâc Ahmed Ağa’ya deyn-i mezkûru olan iki bin iki yüz elli guruşa her birimiz tarafeynden bi’l-emr [16a] ve’l-kabûl kefâlet-i mutlaka-yı sahîha-i şer‘iyye ile müte‘âkiben kefîl bi’l-mâl ve dâmin olarak deyü ikrârlarını merkūmândan her biri bi’l-muvâcehe tasdîk eyledikleri İstanbul Mahkemesi’nden huzûr [-ı âlîlerine i‘lâm olundu.] Fî 19 Z sene 1236