İstanbul Mahkemesi 137 Numaralı Sicil (H.1236-1238 / M 1821-1822) cilt: 86, sayfa: 111 Hüküm no: 73 Orijinal metin no: [16b-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. İstanbul’daki Rum milletinin nüfus sayımının yapılması için İstanbul Kadısına buyruldu Rum tâifesinin tekrar tahrîri içün emr-i âli Fermân dahi kaydolunmuşdur Bâ-sahh-ı âlî İstanbul Kādısı fazîletlü efendi Devlet-i aliyye’nin cizye-güzâr re‘âyâsı olan Rum milletinin bağteten isyânları cihetiyle Dersa‘âdet ve bilâd-ı selâse ve civârında bulunan Rum re‘âyâsı mukaddem memûrlar ma‘rifetiyle sebt-i defter olunmuş ise de ale’l-infirâd keyfiyetleri tasrîh ve îzâh olunmamış olduğundan tekrar me’mûrlar ma‘rifetleriyle sebt-i defter olunması ittifâk-ı ârâ ile karâr-gîr olarak ol bâbda irâde-i seniyye dahi müte‘allik olmuş ve keyfiyet iktizâ eden me’mûrlara ve Rum patriğine başka başka evâmir-i aliyye ısdârıyla bildirilmiş olmağla siz dahi Rumları tahrîr içün me’mûrların kol kol ta‘yîn edecekleri adamlar ma‘iyetlerine taraf-ı şer‘den mu‘temed kâtibler terfîk ederek takım takım ve mahalle mahalle tahrîr ve her birinin isim ve resmi ve san‘at ve vilâyeti ve dükkân ve destgâhı ve bîkâr mıdır ve ne makūledir hâl ve keyfiyeti ale’l-izâh sebt ve tezkîr olunmasını ta‘yîn olunacak kâtiblere etrâfıyla tefhîm eyleyesin deyü [buyruldu]. Fî 22 Z sene 1236