İstanbul Mahkemesi 137 Numaralı Sicil (H.1236-1238 / M 1821-1822) cilt: 86, sayfa: 110 Hüküm no: 72 Orijinal metin no: [16b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Acı Kiryako v. Todori’nin, tütün dükkânı gediğini Halil Usta b. Osman’a sattığı Bin üç yüz guruşa tütüncü mübâya‘ası Ma‘rûz[-ı dâ‘î-i devlet-i aliyyeleridir ki] İstanbul’da duhân gümrüğü kurbünde yağcılar sokağında vâki‘ gediği maden kaleminde Acı Kiryako v. Todori zimmî ismine mukayyed olan tarafeyni mehâzin ve bir tarafdan gümrük-i mezkûr ve bir tarafdan tarîk-i âm ile mahdûd şehriye on iki guruş kirâ-yı kadîmeli bir bâb tütüncü mahzeni derûnunda mevcûde beyne’l-esnâf gedik tâ‘bir olunur âlât-ı lâzıme-i ma‘lûmenin harîkde zâyi‘ olduğu ihbâr olunan sûreti mantûkunca mâliki olan mersûm Acı Kiryako zimmî meclis-i şer‘-i münîrde elli altı bölüğün ustası bâ‘isü’l-i‘lâm Halil Usta b. Osman mahzarında esnaf-ı merkūme kethüdâsı vekîli es-Seyyid Mustafa ve Yiğitbaşı es-Seyyid Abdullah Ağa ve esnafdan Mustafa Ağa ve sâirleri hâzır oldukları hâlde takrîr-i kelâm edüp ber-vech-i muharrer mâlik olduğum âlât-ı gedik-i mezkûru tarafeynden îcâb ve kabûlü hâvî şürût-ı müfsideden ârî bey‘-i bâtt-ı sahîh-i şer‘î ile dört bin üç yüz guruş semen-i medfû‘ ve makbûza merkūm Halil Usta’ya bey‘ ve temlîk ve teslîm eylediğimde ol dahi ber-vech-i muharrer iştirâ ve temellük ve tesellüm ve kabz ve kabûl edüp mebî‘-i mezkûrun tağrîr ve gabnine müte‘allika âmme-i da‘vâdan dahi her birimiz âharın zimmetini ibrâ-i âmm-ı sahîh-i şer‘î ile kabulü hâvî ibrâ ve iskât etmemizle ba‘de’l-yevm âlât-ı gedik-i mezkûrda benim aslâ ve kat‘â alâka ve medhalim kalmayup müşteri-i merkūmun mâl-ı müşterâsı olmuşdur dediğini merkūm Halil Usta ba‘de’t-tasdîk merkum Halil Usta âlât-ı gedik-i mezkûrun kaleminde mersûm Acı Kiryako zimmî üzerine olan kayd-ı atîki ref‘ ve terkīn ile bu def‘a kendi ismine kayd ile yedine müceddeden sûret i‘tâsı niyâzında olup ve fi’l-hakīka bu makūle kaleminde mukayyed gedik âlâtı âhara bey‘ olundukta bâyi‘ ismine olan kaydı ref‘-birle müşteri ismine kayd ve yedine sûret i‘tâsı şürût-ı nizâmlarından olduğunu kethüdâ ve hâzirûn-ı merkūmûndan her biri ihbâr etmeleriyle işbu âlât-ı gedik-i mezkûrun bâyi‘-i mersûm Acı Kiryako zimmî üzerine olan kaydı kaleminden ref‘ ve terkīn ve müşteri-i merkum Halil Usta ismine kayd ile yedine müceddeden sûret i‘tâsı iktizâ eylediği İstanbul Mahkemesi’nden [huzûr-ı âlîlerine i‘lâm olundu.] Fî 19 Z sene 1236