İstanbul Mahkemesi 137 Numaralı Sicil (H.1236-1238 / M 1821-1822) cilt: 86, sayfa: 111 Hüküm no: 75 Orijinal metin no: [17a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Galata’daki Berber esnâfının nizâmlarına dair ferman verildiği Berber esnâfının nizâmları Ma‘rûz[-ı dâ‘î-i devlet-i aliyyeleridir ki] Sâdır olan fermân-ı âlişâna imtisâlen Galata ve tevâbi‘inde vâki‘ bi’l-cümle berberân esnâfının işbu arzuhâlinde ve hâmişinde mastûr derkenâra ve muktezâya nazar ve mütâla‘a olundukta esnâf-ı mezkûrenin gedikleri kadîmden berü beynlerinde mu‘teber ve iki yüz doksan beş gedikden ibâret ise de bin iki yüz sekiz senesi Cemâziyelevvelîsi’nin yedinci gününe değin şürût-ı nizâma dâhil olmadığından halelden sâlim olmamak takrîbiyle târih-i mezkûrda bi’l-cümle esnâf-ı mezkûre iltimâsı ve Galata Kādısı i‘lâmı mûcebince yedlerine verilen târih-i mezkûr ile müverrah ve tuğra-yı garrâ ile mu‘anven fermân-ı âlîşânın başmuhâsebe kaleminde olan işbu derkenâr olunan kaydı mûcebince müstakillen şürût-ı nizâma rabt olunduğu sene-i sâbıkāda esnâf-ı merkūme emr-i âlîşân-ı mezkûrun tecdîdini niyâz eylediklerinde emr-i şerîf-i mezkûrun derci ve İstanbul ve tevâbi‘i berberlerinin ba‘zı muahhar nizâmları zammıyla yedlerine bin iki yüz otuz beş senesinden muahharan emr-i âlîşân verildiği müstebân olup bu sûretde İstanbul berber esnâfı ve bâ-berât-ı âlî kethüdâsı başka ve Galata ve tevâbi‘inde vâki‘ berberân esnâfı ve berât-ı âlîşânda kethüdâsı başka olup ve Galata berberân esnâfının başmuhâsebe kaleminde mukayyed şürûtları zikr olunan bin iki yüz sekiz senesi hılâlinde beldeleri hâkimi i‘lâmıyla nizâma rabt ve yedlerine müstakillen emr-i âlîşân i‘tâ buyrulmuş olduğundan el-hâletü hâzihî Galata ve tevâbi‘i berberân esnâfının kethüdâ ve ustaları ve bu def‘a dahi muahharan yedlerine verilen sâlifü’l-beyân bin iki yüz otuz beş senesi ile müverrah emr-i âlîşân-ı mezkûrun kaleminde olan kayd ref‘ ve terkīn-birle kendilerini İstanbul berber esnâfından fark ve temyîz içün beldeleri hâkimi mûmâ-ileyhin i‘lâmı mûcebince mukaddemâ bin iki yüz sekiz senesi hılâlinde yedlerine verilen emr-i âlîşân-ı mezkûr bi-ibâretihî tecdîd ve bu def‘a yedlerine İstanbul esnâf derc olunarak sâbıkı misillü müceddeden emr-i âlîşân sadaka ve ihsân buyrulmak niyâzında olmalarıyla fi’l-hakīka mukaddem olan nizâmları el-yevm ma‘mûlün-bih olmağla ol vechile Galata ve tevâbi‘i esnâfı yedlerine istid‘âları vechile emr-i âlîşân i‘tâsında beis olmadığı imtisâlen li’l-emri’l-âlî İstanbul Mahkemesi’nden huzûr [-ı âlîlerine i‘lâm olundu.] Fî 15 Z sene 1236