İstanbul Mahkemesi 137 Numaralı Sicil (H.1236-1238 / M 1821-1822) cilt: 86, sayfa: 112 Hüküm no: 76 Orijinal metin no: [17a-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ömer Ağa b. Salih ve zevcesi İbrailli Saime Hatun bt. İsmail’in mahalleden çıkarıldığı Mahalle ihrâcı Ma‘rûz-ı dâ‘î-i devlet-i aliyyeleridir ki İstanbul’da Molla Gürânî kurbünde Seydîbey Mahallesi İmâmı eş-Şeyh Mahmud Efendi b. Numan ve ahâlîsinden es-Seyyid Ali Efendi b. Mustafa ve Hasan Efendi b. Halil ve Mustafa b. Osman ve es-Seyyid İsmail Ağa b. Süleyman ve Hasan Ağa b. Hasan ve Mehmed Emin Ağa ve Mustafa Ağa ve İbrahim Ağa ve diğer Mustafa Ağa ve Hasan Ağa ve Ahmed Ağa ve sâirleri meclis-i şer‘-i münîrde yine mahalle-i mezbûrede sâkinler başkalfacılıkdan muhrec Ömer Ağa b. Salih ve zevcesi İbrailli Saime Hatun bt. İsmail muvâcehelerinde zevcân-ı merkūmân kendi hallerinde ırzlarıyla mukayyedler olmayup dâimâ muvâcehemizde bize şetm ü ezâ etmek âdet-i müstemirreleri olduğundan mâ‘adâ mahallenizi ihrâk ederiz deyü her bâr bizi ihâfe etmeleriyle zevcân-ı mezbûrândan emn ü rahatımız külliyen meslûb olmuşdur deyü her biri teşekkî ve mahalleden hurûclarını iltimâs ettiklerinde onlar dahi sene-i âtiye Muharremi’l-harâmı evâilinde rızâlarıyla mahalle-i mezbûreden çıkıp âhar mahallede sâkinler olmak üzere ta‘ahhüd eyledikleri mübâşirleri Mumcu Mehmed Ağa ma‘rifetiyle İstanbul Mahkemesi’nden huzûr [-ı âlîlerine i‘lâm olundu.] Fî 23 Z sene 1236