İstanbul Mahkemesi 137 Numaralı Sicil (H.1236-1238 / M 1821-1822) cilt: 86, sayfa: 126 Hüküm no: 92 Orijinal metin no: [20b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Cihânbeyli, Atmanlı, Çorumlu, Seyfatlı ve Zîveli aşiretinin Anadolu’dan İstanbul’a getirdiği koyunların kasap esnafına dağıtımı Ağnâm tevzî‘i Ma‘rûz[-ı dâ‘î-i devlet-i aliyyeleridir ki] Anadolu’da Cihânbeyli ve Atmanlu ve Çorumlu ve Seyfatlu ve Zîveli Ekrâdından olup bu def‘a dahi Der-aliyye’ye cem‘an yedi bin beş yüz seksen re’s ağnâm-ı Karaman ve yüz re’s keçi sevk ve tesyîr eden celeb tâifesinden yedi yüz re’s Karaman ağnâmının mâliki Bârhâneci Ebûbekir b. Halil nefsinden asâleten ve sekiz yüz re’s ganemin mâliki el-Hâc Mehmed Ağa b. Kasım ve dört yüz re’s ganemin mâliki Mehmed Ağa b. el-Hâc Ebûbekir taraflarından husûs-ı âtîde vekîlleri olmağla vekâleten ve Atamanlu aşîretinden altı yüz re’s ganemin mâliki Osman b. İbiş dahi nefsinden asâleten ve altı yüz re’s ganemin mâliki Timur ve beş yüz re’s ganemin mâliki Mehmed ve beş yüz re’s ganemin mâliki diğer Mehmed ve dört yüz re’s ganemin mâliki âhar Mehmed ve taraflarından husûs-ı âtîde vekîlleri olmağla vekâleten ve iki yüz seksen re’s ganemin mâliki Çorumlu es-Seyyid Ali b. Musa asâleten ve bir re’s ganemin mâlikleri Seyfatlu Hasan Kethüdâ ve Ramazan oğlu taraflarından vekîlleri merkūm Osman vekâleten ve yedi yüz re’s ganem ve yüz re’s keçinin mâliki Zîveli es-Seyyid el-Hâc Veliyüddin b. el-Hâc Ali dahi asâleten meclis-i şer‘-i münîrde kassab ustalarından es-Seyyid Hasan Efendi ve el-Hâc İbrahim Ağa ve Mercanlı el-Hâc Ali Ağa ve Mimarlı Mehmed Ağa ve Eğrikapu kethüdâsı el-Hâc Osman Efendi ve Edirnekapılı İbrahim Ağa ve Topkapılı Mustafa ve sâirleri hâzır oldukları hâlde kasab esnâfının kethüdâsı el-Hâc Hasan Ağa b. el-Hâc Osman mahzarında her biri takrîr-i kelâm edüp biz ber-vech-i muharrer mâlikler olduklarımız hayvânât-ı mezkûreyi bundan akdemce bâ-fermân-ı âlî verilen nizâm üzere lühûmunun beher kıyyesini kassabân esnâfına otuz yedi para ve kuyruklarının beher kıyyesini kırk para ve ağnâm sakatlarını on para ve keçi sakatlarını beş para i‘tibâriyle ber-mûceb-i nizâm Bosna celebleri ağnâmını dört gün ve bizim ağnâmımızı sekiz gün kassabân esnâfına tevzî‘ içün kethüdâ-yı merkūm el-Hâc Hasan Ağa’ya teslîme ve kethüdâ-yı merkūm dahi ağnâm-ı mezkûrenin mikdâr ve semenlerini mübeyyin yaftalarını hîn-i tevzî‘inden yirmi bir gün mürûrunda ve akçelerini hîn-i tevzî‘inden otuz bir gün mürûrunda esnâfından cem‘ ve tahsîl-birle bize tamamen îfâya ve lühûmun beher kıyyesini narh-ı cârî üzere kırkar paraya ve kuyruğun beher kıyyesini kırk üçer paraya ibâdullâha bey‘e hâlâ hâssa kasabbaşısı efendinin inzımâm-ı re’yi ile ta‘ahhüd ve tarafeynden her birimiz âharın ta‘ahhüdünü kabûl eyledik dediklerini kethüdâ-yı merkūm ba‘de’t-tasdîk ber-mûceb-i nizâm tevzî‘e ta‘ahhüd eyledikleri İstanbul Mahkemesi’nden huzûr [- ı âlîlerine i‘lâm olundu.] Fî 4 M sene 1237