İstanbul Mahkemesi 137 Numaralı Sicil (H.1236-1238 / M 1821-1822) cilt: 86, sayfa: 126 Hüküm no: 91 Orijinal metin no: [20a-5] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Giridli Hacı Hasan Ağa b. Hasan’ın kasap dükkânı anlaşmazlığında Mustafa Ağa b. Ömer ile sulh olduğu Kasımpaşa’da kasab dükkânı nizâ‘ı Ma‘rûz[-ı dâ‘î-i devlet-i aliyyeleridir ki] Sâhib-i arzuhâl kasab esnâfından Giridî el-Hâc Hasan Ağa b. Hasan nâm kimesne meclis-i şer‘-i münîrde derûn-ı arzuhâlde mezkûrü’l-ism Kasab es-Seyyid Mustafa Ağa b. es-Seyyid Ömer nâm kimesne muvâcehesinde kassabân esnâfının Kethüdâsı el-Hâc Hasan Ağa ve ustalarından el-Hâc Hâfız Mehmed Emin Efendi ve es-Seyyid el-Hâc Osman Efendi ve Mimarlı Mehmed Ağa ve es-Seyyid Hasan Efendi ve Molla Feyzullah ve sâirleri hâzır oldukları hâlde merkūm Kasab es-Seyyid Mustafa Ağa mahrûse-i Galata’ya muzâfe kasaba-i Kasımpaşa’da Ağzı nâm mahalde vâki‘ mutasarrıf olduğum kasab dükkânına muttasıl olan bir bâb harâb sebzeci dükkânı bâ-temessük-ı mütevellî bi’l-icâreteyn taht-ı tasarrufunda olduğuna binâen bu esnâda hilâf-ı emr-i âlî ve mugāyir-i şürût-ı nizâm zikr olunan harâb sebzevâdçı dükkânını kasab dükkânı ve verâsını selhhâne yapmak dâ‘iyesinde olmağla men‘ olunması murâdımdır deyü ve merkūm es-Seyyid Mustafa Ağa’nın zikr olunan harâb sebzevâtçı dükkânını kasab dükkânı inşâ etmesi hilâf-ı nizâm idüğü işbu arzuhâl hâmişinde mastûr derkenâr meâlinden zâhir olduğundan başka kethüdâ ve hâzirûn-ı merkūmûndan her biri muvâcehesinde ihbâr dahi etmeleriyle merkūm es-Seyyid Mustafa Ağa kendi dükkânında ticâretiyle meşgūl olup sâlifü’l-beyân sebzevâtçı dükkânını kadîmi vechile sebzeci dükkânı olarak isti‘mâl edüp zikr olunan sebzeci dükkânını vakten mine’l-evkāt [20b] gerek kasab dükkânı ve gerek selhhâne yapmak üzere meclis-i şer‘de ta‘ahhüd etmeğin bu vechile kat‘-ı nizâ‘ eyledikleri İstanbul Mahkemesi’nden huzûr [-ı âlîlerine i‘lâm olundu.] Fî-selh-i Zilhicce sene 1236