İstanbul Mahkemesi 137 Numaralı Sicil (H.1236-1238 / M 1821-1822) cilt: 86, sayfa: 128 Hüküm no: 94 Orijinal metin no: [20b-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Çolak Hasan Reis b. Ali’nin, Ahmed Ağa b. Feyzullah’a olan borcunu ödemesi gerektiği Dört yüz yirmi sekiz guruş hüküm Ma‘rûz[-ı dâ‘î-i devlet-i aliyyeleridir ki] Anadolu’da Perşembe kazâsına tâbi‘ Döne karyesi vücûhundan el-Hâc Ahmed Ağa b. Feyzullah b. el-Hâc Mustafa tarafından husûs-ı âtîde vekîl olduğu es-Seyyid Mahmud b. Ömer ve Salih b. Mehmed şehâdetleriyle sâbit olan sâhib-i arzuhâl es-Seyyid Hüseyin Reis b. Ebûbekir meclis-i şer‘-i münîrde arzuhâlde mezkûrü’l-ism Trabzonlu Çolak Hasan Reis b. Ali muvâcehesinde müvekkilim merkūmun merkūm Çolak Hasan Reis zimmetinde sefîne halatı semeninden altı yüz elli guruş ve bi-şartü’r-rücû‘ emriyle mâlından dâyini Molla oğluna verdiği altı yüz guruş ve mikdâr ve fiyatı beynlerinde ma‘lûm kokoroz semeninden üç bin beş yüz guruş ki cem‘an dört bin yedi yüz elli guruşdan gayr-ez teslîmât sahhe’l-bâkī bin dört yüz seksen guruş hakkı olup ve ben meblağ-ı bâkī-i mezbûrun ancak altmış guruşu mutâlebesine müte‘allika da‘vâdan merkūmun zimmetini bi’l-vekâle kabûlü hâvî ibrâ etmemle bâkīsi olan bin dört yüz yirmi guruşu merkūm Çolak Hasan Reis’den bi’l-vekâle hâlâ taleb ederim deyü da‘vâ ettikte ol dahi cevâbında ber-minvâl-i muharrer ikrâr u i‘tirâf etmeğin mûcebince meblağ-ı bâkī-i mezbûr bin dört yüz yirmi guruşun müvekkil-i merkūm el-Hâc Ahmed Ağa içün vekîli müdde‘î-i merkūm es-Seyyid Hüseyin’e edâsıyla mezbûr Çolak Hasan Reis ilzâm olunduğu İstanbul Mahkemesi’nden huzûr [-ı âlîlerine i‘lâm olundu.] Fî 2 M sene 1237