İstanbul Mahkemesi 137 Numaralı Sicil (H.1236-1238 / M 1821-1822) cilt: 86, sayfa: 128 Hüküm no: 95 Orijinal metin no: [20b-4] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Agob v. Kirih’in, uncu değirmeni gediğini Seyyid İsmail Ağa b. Mehmed Emin’e sattığı <<İşbu hüccet battâlda kalmağla tekrar dört varaka aşağı kaydolundu işbu mahalde n kaydı darb olundu. [Mühür] Ma‘rûz[-ı dâ‘î-i devlet-i aliyyeleridir ki] Mahrûse-i Galata’ya muzâfe Kasımpaşa’da Zindân ardında kâin ma‘lûmü’l-hudûd iki horoslu bir bâb uncu değirmeni derûnunda mevcûde beyne’l-esnâf gedik tâ‘bir olunur sekiz re’s bârgir ve onlara isâbet eden sâir âlât-ı lâzıme-i ma‘lûmeden bir re’s bârgir ve on altı mıh hissesine bâ-hüccet mâlik olan uncu tâifesinden Agob v. Kirih nâm zimmî meclis-i şer‘-i münîrde habbâzân Kethüdâsı Mehmed Ağa ve uncular kethüdâsı diğer Mehmed Ağa ve uncular kethüdâsı sâbık İbrahim Ağa ve tüccârdan Çetecioğlu İbrahim Ağa ve Uncu Osman Ağa ve Yiğitbaşıları İbrahim Ağa ve sâirleri hâzır oldukları hâlde âlât-ı gedik-i mezkûrun mâ‘adâ hissesine mâlik olan bâ‘isü’l-i‘lâm Uncu es-Seyyid İsmail Ağa b. es-Seyyid Mehmed Emin nâm kimesne mahzarında takrîr-i kelâm edüp ben ber-vech-i muharrer mâlik olduğum hisse-i mezkûremi tarafeynden bi’l-îcâb ve’l-kabûl bâtten ve sahîhan bi-safkatin vâhidetin müşterikim mezbûr es-Seyyid İsmail Ağa’ya iki bin beş yüz guruşa bey‘ ve temlîk ve teslîm eylediğimde ol dahi ber-vech-i muharrer iştirâ ve temellük ve tesellüm ve kabz ve kabûl edüp semen-i mezkûr iki bin beş yüz guruşun [21a] bin beş yüz yirmi dokuz guruşunu benim cânib-i mîrîye olan deynime mahsûben kabzına memûra vermek üzere müşteri-i merkūma emr eylediğimde ol dahi emrim üzere teslîme ta‘ahhüd edüp bâkīsi olan dokuz yüz yetmiş bir guruşu dahi bana def‘ ve teslîm ben dahi yedinden ahz ü kabz etmemle mebî‘-i mezkûrun tağrîr ve gabnine müte‘allika âmme-i da‘vâdan tarafeynden her birimiz âharın zimmetini ibrâ-i âmm-ı sahîh-i şer‘î ile kabûlü hâvî ibrâ ve iskāt etmemizle ba‘de’l-yevm hisse-i mezkûrede benim kat‘â alâkam kalmayup mecmû‘u merkūm es-Seyyid İsmail Ağa’nın mâlıdır dediğini mezbûr es-Seyyid İsmail Ağa ba‘de’t-tasdîk merkūm es-Seyyid İsmail Ağa âlât-ı gedik-i mezkûrun kaleminde mâlik-i sâbıkı üzere olan kayd-ı atîkleri ref‘ ve terkīn-birle mezbûr es-Seyyid İsmail Ağa’nın ismi tasrîhiyle kalemine müceddeden kayd ve yedine sûret i‘tâ buyrulması niyâzında olup ve fi’l-hakīka esnâf-ı merkūmenin bu makūle kaleminde mukayyed gedik âlâtının mâliki sâbıkı üzerinde olan kaydı ref‘ ve terkīn-birle hâlâ mâliki ismine kaydolunmak şürût [ve] nizâmlarından olduğunu habbâzân kethüdâsı Mehmed Ağa ve uncular kethüdâsı diğer Mehmed Ağa ve sâirleri ihbâr etmeleriyle bu sûretde işbu gedik âlâtı dahi mezbûr es-Seyyid İsmail Ağa’nın istid‘âsı vech üzere şürût-ı nizâmlarına tatbîkan mezbûr es-Seyyid İsmail Ağa ismine keyd ve yedine müceddeden sûret i‘tâsı iktizâ eylediği huzûr [-ı âlîlerine i‘lâm olundu.] Fî 5 M sene 1237>>