İstanbul Mahkemesi 137 Numaralı Sicil (H.1236-1238 / M 1821-1822) cilt: 86, sayfa: 137 Hüküm no: 103 Orijinal metin no: [23a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Hasan Mirza Efendi b. Ahmed ile Miyaki v. Avanes’in alacak davasının henüz karara bağlanmadığı Üç bin beş yüz guruş hüküm Ma‘rûz[-ı dâ‘î-i devlet-i aliyyeleridir ki] Müderrisîn-i kirâmdan sâbıkā Badracık kazâsı nâibi es-Seyyid Hasan Mirza Efendi b. Ahmed Efendi meclis-i şer‘-i münîrde arzuhâlde ismi mezkûr İzmir tüccârından Miyaki v. Avanes nâm zimmî muvâcehesinde ben işbu sene-i mübâreke Recebinde kazâ-i mezbûrda nâibü’ş-şer‘ iken şehr-i mezkûrun beşinci günü kazâ-i mezbûr kocabaşısı Konomoğlu Yorgaki v. Atam zimmîye mâlımdan üç bin guruş karz verüp ol dahi yedimden ahz ve umûruna sarfla istihlâk etmekle meblağ-ı mezkûr üç bin beş yüz guruş zimmetinde bana deyni olup ve meblağ-ı mezbûr üç bin beş yüz guruşu Der-aliyye’de mütemekkin mersûm Miyaki bâzergân kendi hesâbına mahsûb etmek üzere yedime bir kıt‘a poliçe temessükü verüp ve meblağ-ı mezbûr ile beni ve mersûm Miyaki zimmî üzerine gıyâbında havâle eylediğinde ben dahi kabûl edüp râzı olduğumdan sonra kazâ-i mezbûru bırakıp Der-aliyye’ye gelüp ve gāib-i mesfûrun havâle-i mezkûresini mersûm Miyaki zimmîye sene-i mezkûre Şevvâlinin on beşinci günü İstanbul’da Osmaniye civârında vâki‘ sâkin olduğum konakda ifâde eylediğimde ve mersûm Miyaki zimmî gāib-i mersûmun havâle-i mezkûresini kabûl eyledim meblağ-ı mezkûr üç bin beş yüz guruş sana deynimdir yüz bir günü tamamında edâ ederim deyü meblağ-ı mezkûr üç bin beş yüz guruşa dâmin olmuşken meblağ-ı mezkûru bana edâdan imtinâ‘ etmekle meblağ-ı mezkûr üç bin beş yüz guruşu mersûm Miyaki zimmîden hâlâ taleb ederim deyü mazmûnu takrîrine mutâbık bir kıt‘a poliçe temessükü mantûkunca ba‘de’d-da‘vâ ve’l-inkâr müdde‘î-i mûmâ-ileyhin ber-minvâl-i muharrer müdde‘âsı sene-i sâbıkā Zilka‘desinin yirmi ikinci günü beyâna havâle olunup tarafeyn bir dahi zuhûr etmemeleriyle da‘vâlarına faysal verilmediği cerîdemizde mazbût olmağın imtisâlen li’l-emri’l-âlî sûret zabtı İstanbul Mahkemesi’nden huzûr [-ı âlîlerine i‘lâm olundu.] Fî 6 M sene 1237